QR Ulttyq banki 2015 jylǵy sáýirde qabyldanǵan Ipotekalyq qaryzdardy qaıta qarjylandyrý baǵdarlamasyna ózgerister men tolyqtyrýlardy bekitti, dep habarlaıdy vedomstvonyń baspasóz qyzmeti. Bul týraly Basqarma otyrysynyń qorytyndylary boıynsha QR UB tóraǵasy Danııar Aqyshev aıtyp berdi.
«Baǵdarlamaǵa ózgerister men tolyqtyrýlar eki bloktan turady. Birinshi blok Memleket basshysynyń 2018 jylǵy 10 qańtarda Qazaqstan halqyna Joldaýynda Ulttyq bankke bergen tapsyrmasyn iske asyrýǵa baǵyttalǵan. Memleket basshysy Ulttyq bankke halyqqa 2016 jylǵy 1 qańtarǵa deıin berilgen valıýtalyq ıpotekalyq qaryzdar boıynsha máseleni túpkilikti sheshýdi tapsyrdy. Qazaqstanda osy baǵdarlamany iske asyrý nátıjesinde is júzinde jeke tulǵalardyń baspanamen jáne ózge jyljymaıtyn múlikpen qamtamasyz etilgen barlyq valıýtalyq ıpotekalyq qaryzdary teńgege aýystyrylatyn bolady», - dep atap ótti qarjy retteýshisiniń basshysy.
D. Aqyshev 2016 jylǵy 1 qańtardan bastap kiristeri shetel valıýtasynda emes jeke tulǵalarǵa shetel valıýtasynda jańa ıpotekalyq qaryzdar berýge zańnamalyq turǵydan tyıym engizilgenin eske salyp, jańartylǵan baǵdarlamanyń negizgi talabyn aıtyp ótti. «Baǵdarlama jeke tulǵalardyń 2016 jylǵy 1 qańtarǵa deıin alynǵan valıýtalyq ıpotekalyq qaryzdaryn Ulttyq banktiń 2015 jylǵy 18 tamyzdaǵy baǵamy boıynsha teńgemen qaıta qarjylandyrýdy kózdeıdi. Baǵdarlamaǵa engizilgen tolyqtyrýlar 21 myńnan asa qaryz alýshynyń qaryzdaryn óteýge ońtaıly jaǵdaılar jasaıdy», - dedi ol.
D. Aqyshev valıýtalyq ıpotekalyq qaryz alýshylardyń nazaryn baǵdarlama sheńberinde qaryzdy qaıta qarjylandyrý týraly ótinishpen óziniń kredıt bergen bankine tez arada júginý qajettiligine aýdarýdy surady. «Baǵdarlamaǵa engizilgen ózgeristerdiń ekinshi blogy 2004 - 2009 jyldardaǵy kezeńde qaryz alǵan ıpotekalyq qaryz alýshylarǵa qoldaý kórsetýge baǵyttalǵan. Bul baǵdarlama sheginde búgingi kúni 23 myńnan astam qaryz alýshyǵa kómek kórsetildi. Olar ózderiniń jalǵyz baspanalaryn saqtap, ıpotekalyq qaryzdary boıynsha tólemderin jeńildete aldy.
Aqshany ıgerýdiń revolverlik tetigin eskersek, qaıta qarjylandyrylǵan qaryzdar sany 2026 jylǵa deıin shamamen 40 myń bolady dep boljanyp otyr», - dep atap ótti Ulttyq bank basshysy. Sondaı-aq aq ol baǵdarlamaǵa ózgerister men tolyqtyrýlardy qabyldaý aldynda bankterdiń, qoǵamdyq birlestikterdiń jáne QR Úkimetiniń úlken jumys júrgizgenin málim etti. «Jalpy alǵanda Memleket basshysynyń tapsyrmalaryn tıimdi iske asyrý maqsatynda Úkimetpen birlesip bankter úshin jáne sol sııaqty qaryz alýshylar úshin salyq artyqshylyqtaryn berý boıynsha jumys júrgizildi», - dep naqtylady D. Aqyshev.
D. Aqyshev Ulttyq banktiń ıpotekalyq qaryz alýshylarǵa, onyń ishinde halyqtyń áleýmettik osal toptaryna jatatyn qaryz alýshylarǵa kómek kórsetýdiń úshinshi kezeńine kiriskenin atap ótti. «Biz, memlekettik qoldaýǵa halyqtyń áleýmettik osal toptaryna jatatyn qaryz alýshylardyń erekshe muqtaj ekenin kórip otyrmyz. Olardyń kópshiliginiń jalǵyz tabys kózi is júzinde memlekettik tólemder men járdemaqylar bolyp tabylady. Kredıtterin tóleý úshin olardy bankterge berýge májbúr. Qazir Ulttyq Bank mańyzdy zańnamalyq bastama jasady. Onyń máni: qaryz alýshynyń ıpotekalyq qaryz boıynsha mindettemelerin oryndamaýyna baılanysty baǵdarlama sheńberinde bankterge óndirip alý aınalysy nátıjesinde olardyń menshigine ótken turǵyn úıdi jalǵa tapsyrý quqyǵy berildi. Osy túzetý qaryz alýshyǵa oǵan buryn tıesili bolǵan turǵyn úıdi óz menshigine qaıtaryp alý múmkindigi beriledi», - dedi ol. «Memlekettiń obektıvti jaǵdaılar nátıjesinde qıyn jaǵdaıǵa tap bolǵan ıpotekalyq qaryz alýshylarǵa kómek kórsetý boıynsha buryn-sońdy bolmaǵan sharalar qabyldaıtynyn atap ótkim keledi.
Jınaqtalǵan tájirıbe eskerile otyryp qarjy retteýshisiniń kúsh-jigeri sondaı-aq ıpotekalyq kredıtteýdi yntalandyrýǵa baǵyttalady dep oılaımyn. Máselen, qazirgi kezde Ulttyq bank «7 - 20 - 25. Árbir otbasy úshin turǵyn úı satyp alýdyń jańa múmkindikteri» baǵdarlamasyn ázirleý boıynsha jumys júrgizýde», - dep túıindedi D. Aqyshev.