QR Premer-Mınıstri Baqytjan Saǵyntaev Ońtústik Qazaqstan oblysyna jumys sapary aıasynda «Saryaǵash jer syıy» kóshetterdi ósirý tálimbaǵyn aralaǵannan keıin AО́K damytýdyń memlekettik baǵdarlamasy men Prezıdenttiń «Shaǵyn nesıe berýdi kóbeıtý» tórtinshi áleýmettik bastamasyn júzege asyrý boıynsha aýyl sharýashylyǵy taýaryn óndirýshilermen kezdesý ótkizdi, dep habarlaıdy primeminister.kz.
Kezdesý barysynda aýyl sharýashylyǵyn damytýdyń ózekti máseleleri talqylandy. Atap aıtqanda, eksporttyq áleýet, sýbsıdııalaý, aýyl sharýashylyǵy ónimderin óńdeýge ınvestısııalar tartý, AО́K-ti tehnologııalyq jańǵyrtý, etti mal sharýashylyǵy men ósimdik sharýashylyǵyn damytý máseleleri qaraldy.
QR Premer-Mınıstri Baqytjan Saǵyntaev Qazaqstannyń agroónerkásiptik kesheni perspektıvalyq bolashaqqa ıe ekenin atap ótti. Elimiz kóptegen pozısııalar boıynsha álemdegi agrarlyq eksporttyq ónimder shyǵaratyn iri óndirýshilerdiń biri bola alady. Osy maqsatta Úkimet barlyq qajetti sharalardy qabyldap jatyr: AО́K damytýdyń memlekettik baǵdarlamasy júzege asyrylýda; veterınarııalyq qyzmettiń baǵynyshtylyǵyn qalpyna keltirýdi, bıznestiń ǵylymı zertteýlerge qatysýyn yntalandyrýdy, daıyndaý uıymdaryn sýbsıdııalaýdy qarastyratyn zań jobasy usynyldy; eksportqa baǵdarlanǵan kásiporyndardyń paıdasy úshin sýbsıdııalaý saıasaty qaıta qaralyp jatyr.
Prezıdenttiń «Shaǵyn nesıe berýdi kóbeıtý» atty tórtinshi áleýmettik bastamasy aıasynda agrarlyq qyzmetkerler úshin jańa múmkindikter ashylyp jatyr. Shaǵyn nesıe berýdi qarjylandyrýǵa 20 mlrd teńge baǵyttaldy. Bul óz bıznesin bastaýdy kózdep júrgen azamattarǵa usynylatyn úlken qoldaý bolady.
Aýyl sharýashylyǵynyń birinshi vıse-mınıstri A.Evnıev Prezıdenttiń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» Joldaýy men Memleket basshysynyń «Shaǵyn nesıe berýdi kóbeıtý» tórtinshi áleýmettik bastamasyn iske asyrý barysy men fermerlerdiń múmkindikteri týraly baıandady.
Sondaı-aq, talqylaý barysynda «Ordabasy qus» JShS dırektory M.Taǵaev, «Saryaǵash jer syıy» JShS dırektory T.Shyńtasov, «Nuraly jol» sharýa qojalyǵynyń tóraǵasy E.Eralıev, Jylyjaılar qaýymdastyǵynyń tóraǵasy M.Snabaev pikir bildirdi.
Kezdesý barysynda aıtylǵan usynystardy Aýyl sharýashylyǵy mınıstrligi men tıisti memlekettik organdar egjeı-tegjeıli qarastyratyn bolady.