Qazaqstan Respýblıkasynyń Memlekettik hatshysy Gúlshara Ábdiqalyqovanyń tóraǵalyǵymen Qazaqstan Respýblıkasynyń Prezıdenti janyndaǵy Sybaılas jemqorlyqqa qarsy is-qımyl máseleleri jónindegi komıssııa otyrysy ótti, dep habarlaıdy Aqordanyń baspasóz klýby.
Jıynda 2015-2025 jyldarǵa arnalǵan Sybaılas jemqorlyqqa qarsy strategııany júzege asyrýǵa baǵyttalǵan 2015-2017 jyldardaǵy is-sharalar josparynyń oryndalý nátıjeleri, sondaı-aq memlekettik kiris organdaryndaǵy jemqorlyqqa qarsy áreket baǵytynda qabyldanyp jatqan sharalar qaraldy.
Otyrysty ashqan Gúlshara Ábdiqalyqova Nursultan Nazarbaevtyń Qazaqstan halqyna arnaǵan «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty joldaýyndaǵy sybaılas jemqorlyqtyń aldyn alýǵa baılanysty kúres jalǵasa beredi degen sózine toqtaldy. Memlekettik organdardaǵy úderisterge, sonyń ishinde olardyń turǵyndarmen jáne bıznes ókilderimen ózara yqpaldastyǵyna sıfrlandyrý tehnologııalaryn engizý mańyzdy bolyp sanalady.
– Jalpy alǵanda, qabyldanǵan sharalar «Transparensı Interneshnldiń» sybaılas jemqorlyqty qabyldaý ındeksinde Qazaqstannyń 9 satyǵa kóterilýine múmkindik berdi, – dedi Memlekettik hatshy. О́tken úsh jylda ákimshilik kedergilerdi aıtarlyqtaı azaıtýǵa, turmystyq sıpattaǵy sybaılas jemqorlyqty báseńdetýge, sondaı-aq memlekettik organdar qyzmetiniń ashyqtyǵyn arttyrýǵa qol jetkizildi.
Memlekettik qyzmet isteri jáne sybaılas jemqorlyqqa qarsy is-qımyl jónindegi agenttik pen Qarjy mınıstrliginiń Memlekettik kirister komıtetiniń baıandamalary tyńdaldy.
Sybaılas jemqorlyqqa qarsy strategııany júzege asyrý baǵytynda 2015-2017 jyldarǵa arnalǵan is-sharalar jospary boıynsha 63 shara atqaryldy, sonyń ishinde 4 jańa zań, 20 normatıvtik-quqyqtyq akt ázirlenip, 8 aqparattyq júıe iske qosyldy, sondaı-aq 36 uıymdastyrý is-sharasy ótkizildi. Qazirgi ýaqytta Qazaqstan Respýblıkasynyń 2025 jylǵa deıingi damýynyń strategııalyq jospary eskerile otyryp ázirlengen Sybaılas jemqorlyqqa qarsy strategııany júzege asyrý baǵytynda 2018-2020 jyldarǵa arnalǵan is-sharalar jospary bekitilýge usynyldy.
Komıssııa otyrysynyń qorytyndysy boıynsha memlekettik kirister komıtetiniń ishki qaýipsizdik bólimsheleriniń jumysyn jandandyrý, qaramaǵyndaǵy qyzmetkerlerdiń jemqorlyq sıpatyndaǵy quqyq buzýshylyǵy úshin basshylardyń jaýapkershiligin arttyrý, sondaı-aq jemqorlyq qaterin azaıtý úshin sıfrlyq tehnologııalardy engizý jóninde tapsyrmalar berildi.