Qalalyq máslıhattyń kezekti sessııasy barysynda depýtattar Astana qalasynda jańadan qurylǵan «Baıqońyr» aýdany ákiminiń taǵaıyndalýyn maquldady.
Astana qalasy ákimdigi baspasóz qyzmetiniń málimetinshe, «Baıqońyr» aýdanynyń ákimi qyzmetine Erlan Qanalımovtyń kandıdatýrasy usynylǵan. Máslıhat depýtattary usynysty biraýyzdan qoldady.
Qanalımov Erlan Ermekuly 1982 jyly 22 tamyzda dúnıege kelgen. Astana qalasynyń Basqarý ınstıtýtynda, Qazaqstan-Reseı ýnıversıtetinde bilim alǵan. Astana qalasy «Saryarqa» aýdany ákimi apparaty uıymdastyrý-baqylaý jáne kadrlyq bóliminiń bas mamany, bastyǵy, aýdan ákiminiń keńesshisi; Astana qalasy ákimi apparatynyń uıymdastyrý-ınspektorlyq bóliminiń meńgerýshisi; Apparat basshysynyń orynbasary; Astana qalasy ákimdigi «Daǵdarys ortalyǵy» KMM-niń dırektory bolǵan.
Jańa taǵaıyndaýǵa deıin "Astana qalasy Ishki saıasat basqarmasy" MM-niń basshysy qyzmetin atqarǵan. Qazaqstan Respýblıkasy Prezıdentiniń alǵys hatymen, birqatar mereıtoılyq medaldarmen marapattalǵan.