Shymkentte tuǵyndardyń jappaı ýlanýyna sebepshi bolǵan balmuzdaq satatyn oryndy tekserý jumystary bastalyp ketti. Bul týraly oblystyq densaýlyq saqtaý basqarmasynda ótken brıfıngte aıtyldy, dep habarlaıdy QazAqparat.
Sala mamandarynyń sózinshe, oblystyq qoǵamdyq densaýlyq saqtaý departamenti men oblystyq densaýlyq saqtaý basqarmasynyń mamandarynan arnaıy brıgada qurylǵan. Olar «Iýjnoe» dep atalatyn saýda núktesin tekserip jatyr.
«Bizde zerthana bar sol jerge balmuzdaq satqan orynnan arnaıy synamalar alyndy. Ol jerdegi qyzmetkerlerden de anamnez aldyq. Odan keıin bir brıgadamyz aýrýhanada ár naýqaspen sóılesip, jeke-jeke anamnez alyp jatyr. Barlyǵy tekserilýde. Nátıjeleri boljam boıynsha úsh kúnnen keıin daıyn bolady»,-deıdi oblystyq qoǵamdyq densaýlyq saqtaý departamenti bastyǵynyń orynbasary. Al, oblystyq densaýlyq saqtaý basqarmasynyń basshylyǵy balmuzdaqtan ýlanǵandardyń alǵashqy legi Shymkent qalalyq juqpaly aýrýlar aýrýhanasyna 29 - 30 naýryzy kúnderi túskenin aıtady.
«Naýqastar birneshe ret toqtamaı qusý men ishtiń júrýine shaǵymdanǵan. Búgingi ýaqytta olardyń qatary 39-ǵa jetti. Túskenderdiń 21-i eresek adam, 14 jasqa deıingi 11 bala jáne 7 jasóspirim bar. Jas erekshelikteri 15 jastan 18 jasqa deıin. Kórsetilgen naýqastar arasynda 3-ýi aýrýhananyń jansaqtaý bólimshesine jatqyzyldy. Onyń 1-ýi eresek adam, bireýi júkti áıel, 2 jasóspirim bala. Búgingi kúnge barlyq naýqastardyń jaǵdaıy turaqty, olarǵa tıisti em - dom kórsetilýde. Aýrýhanada tósek oryndary jetkilikti»,- deıdi oblystyq densaýlyq saqtaý basqarmasy basshysynyń orynbasary Aıgúl Jaqypqyzy.
Eske salaıyq, kesheden beri Shymkentte turǵyndar balmuzdaq jep, jappaı ýlanyp qalǵan bolatyn. Barlyǵy da balmuzdaqty bir jerden satyp alǵanyn jetkizgen.