Ońtústik Qazaqstan oblysynda qaǵaz qaldyqtarynan karton shyǵaratyn kásiporyn jumysy jandana túsýde. Alaıda kásiporyn toqtaýsyz jumys isteýi úshin qaǵaz qaldyqtary, ıaǵnı makýlatýra qajet.
«Ońtústik» ındýstrııaldy aımaǵynda 2016 jyly jyly iske qosylǵan, karton shyǵaratyn «Býmprom» JShS búginde qajetti shıkizatti Qyzylorda, Almatydan tasymaldap, oblys boıynsha jınaýda. Kásiporyn basshysynyń orynbasary Serik Tashnazarovtyń aıtýynsha, óndiriske qajetti qaǵaz qaldyqtarynyń bir kelisi 40 teńgeden satyp alynady. Kórshilerimiz Qyrǵyzstan men О́zbekstanda óńdeletin qaǵazǵa qajettilik joǵary. Sondyqtan da ońtústik óńirlerdegi qaǵaz qaldyqtaryn kórshi el kásipkerleri kóptep satyp alýda. Kásiporyn basshylarynyń aıtýynsha, ózbekstandyq kásipkerler makýlatýranyń bir kelisiniń baǵasyn 60 teńgege deıin kóterip jibergen.
Aıta ketelik, qaǵaz qaldyqtaryn óńdeý maqsatyndaǵy jobanyń jalpy quny 200 mln teńge. Kásiporyn jylyna 4 myń, al aıyna 350 tonna ónim shyǵarýǵa qaýqarly. Qytaılyq mamandardyń arnaıy oqytýynan ótken 30 adam jumys isteıdi. Zaýyt ónimderine suranys mol. Ásirese, tapsyrystar Pavlodar, Qaraǵandy, Almaty oblystarynan jıi túsedi eken. Aldaǵy ýaqytta kásiporyn ónimderin kórshiles О́zbekstan, Qyrǵyzstan memleketterine jóneltý josparlanyp otyr. Kásiporyn basshylyǵy shıkizattyń baǵasy kúnnen kúnge ósip jatqandyqtan «Atameken» kásipkerlik palatasyna qaǵaz qaldyqtaryn shetelge shyǵarýǵa shekteý qajettigi jóninde usynys joldapty.
Erkin DOSYMBAI,
Ońtústik Qazaqstan oblysy.