Parlament Senatynda «Úzdik densaýlyq saqtaý isi - deni saý ult» taqyrybyna arnalǵan parlamenttik tyńdaý boldy, dep habarlady Parlament Senatynyń Baspasóz qyzmeti.
Sharany Áleýmettik-mádenı damý jáne ǵylym komıtetiniń tóraǵasy Birǵanym Áıtimova ashty. Senator parlamenttik tyńdaýdyń kún tártibinde elimizdegi densaýlyq saqtaý salasynyń qazirgi jaı-kúıi jáne keleshektegi damýy, aýrýlardyń aldyn alý, salamatty ómir saltyn nasıhattaý, dıagnostıka men emdeýdiń úzdik tehnologııasyn qoldaný máseleleri qaralyp otyrǵanyn atap ótti.
Parlament Senatynyń Tóraǵasy Qasym-Jomart Toqaev tyńdaýǵa qatysýshylardyń aldynda sóz alyp, osy saladaǵy oń ózgeristerdi atap ótti. «Bul salada ilgerileý bar. Atap aıtqanda halyqtyń tabıǵı ósýi artyp, ana men bala ólimi azaıdy, birqatar áleýmettik mańyzy bar aýrýlar boıynsha syrqattaný deńgeıi tómendedi», - dedi ol.
Sonymen birge Q.Toqaev tabystarǵa qaramastan, áli kúnge deıin sheshimin tappaǵan birqatar máseleler bar ekenin atap kórsetti. Olar eń aldymen, medısınalyq qyzmettiń qoljetimdiligi men tıimdiligine baılanysty ekeni aıtyldy. Másele tegin medısınalyq kómektiń kepildik berilgen kóleminiń naqty sıpatqa ıe bola almaı otyrǵandyǵynda bolyp otyr. Tóraǵa: «Tegin jáne aqyly túrde kórsetiletin medısınalyq qyzmettiń arajigi aıqyn bolmaǵandyqtan, turǵyndar tarapynan qosymsha tólem jasaý jaǵdaılary oryn alýda. Basqasha aıtqanda, medısına salasynda kórsetiletin aqyly qyzmetterdiń kólemi birtindep artýda», dep atap ótti.
Q.Toqaev bıýdjet esebinen tegin kórsetiletin dárigerlik kómektiń mindetti shegin naqty anyqtaý qajettigine toqtaldy. «Medısınalyq kómektiń qaı túriniń aqyly jáne qaı túriniń kepildik berilgen kómekke jatatyndyǵy turǵyndar úshin aıqyn ári túsinikti bolýy tıis», - dedi Senat Tóraǵasy.
Medısınalyq uıymdardyń zamanaýı tehnologııalarmen jabdyqtalyp otyrǵany, alaıda mundaı jabdyqtardy qoldaný tásilin meńgergen kásibı mamandar áli de jetispeıtinine, qymbat baǵaǵa alynǵan tehnıkanyń qoldanylmaı turǵanyna da nazar aýdaryldy. Q.Toqaev medısına mamandaryn daıyndaýdyń sapasy men olardy tıisti jumys jaǵdaıymen qamtamasyz etý asa mańyzdy mindetterdiń biri ekenin atap ótti. Medısına qyzmetkerleriniń eńbekaqylaryn arttyrý jáne yntalandyrýdyń tıimdi júıesin qalyptastyrý kún tártibinde turǵany aıtyldy. Qazirgi kezde medısınalyq joǵary oqý oryndary jyl saıyn 4000-nan astam maman daıarlaıtynyna qaramastan árbir tórtinshisi ǵana tańdaǵan mamandyǵy boıynsha qyzmet etýde.
Elbasynyń medısınalyq saqtandyrýǵa ótý jumystaryn muqııat ótkizý týraly tapsyrmasyna toqtala kelip, Q.Toqaev aldaǵy ýaqytta tyńǵylyqty daıyndalyp, týyndaýy múmkin táýekelderge jol bermeý kerektigin atap ótti.
Densaýlyq saqtaý salasyna bólinetin qarjyny tıimdi paıdalanýdyń mańyzyna erekshe nazar aýdaryldy. Bul rette álemdik tájirıbege súıený qajet. Tóraǵa álemdegi densaýlyq saqtaý júıesi úzdik bolyp tabylatyn memleketterdi, olardyń ishinde Sıngapýr, Japonııa, Ońtústik Koreıa, Ispanııa elderiniń tájirıbelerin mysalǵa keltirdi. Sarapshylardyń aıtýynsha, bul memleketterde densaýlaq saqtaý salasyn qarjylandyrý deńgeıi tómen ekeni belgili boldy.
Tyńdaý barysynda densaýlyq saqtaý mınıstri Eljan Birtanov sóz alyp, depýtattardy «Halyq densaýlyǵy jáne densaýlyq saqtaý júıesi týraly» kodeksiniń oryndalý barysy týraly depýtattardy jan-jaqty habardar etti. Mınıstr bul kodekstiń jańa mátinin ázirleý týraly aıta kelip, sondaı-aq densaýlyq saqtaý salasyndaǵy ózekti máseleler men olardy sheshý joldaryna toqtaldy.
Parlamenttik tyńdaýǵa qatysýshylar aldynda Qaraǵandy oblysynyń ákimi Erlan Qoshanov, «Ulttyq neırohırýrgııa ortalyǵy» AQ Basqarmasynyń tóraǵasy Serik Aqsholaqov, Qostanaı oblysy ákiminiń orynbasary Marat Júndibaev, qoǵamdyq uıymdar men dárigerlik mekemelerdiń ókilderi qatysty.
Dúnıejúzilik banktiń Ortalyq Azııa óńiri jónindegi áleýmettik sektorynyń aǵa úılestirýshisi Sýsanna Aırapetıan men Halyqaralyq Dentons Business Services Emea kompanııasy strategııalyq medısınalyq tehnologııalar jónindegi keńesshisi Kshıshtof Landanyń baıandamalary qatysýshylardyń yqylasyn týǵyzdy.
Senat depýtattary parlamenttik tyńdaýdyń kún tártibindegi máseleler boıynsha pikir alysty.
Áleýmettik-mádenı damý jáne ǵylym komıtetiniń tóraǵasy Birǵanym Áıtimova sharany qorytyndylaı kelip, parlamenttik tyńdaýdyń mańyzy men onyń nátıjeli bolǵanyn atap ótti. Onyń aıtýynsha, sharaǵa qatysýshylar densaýlyq saqtaý salasynyń jaı-kúıi týraly egjeı-tegjeıli habardar boldy. Pikirsaıys qorytyndysy boıynsha memlekettik organdar men múddeli taraptar úshin usynystar qabyldandy.
Tyńdaý aıasynda otandyq dári-dármek jasaýdaǵy jetistikter, densaýlyq saqtaý salasyndaǵy jańa ınnovasııalyq tehnologııalar, sıfrlyq utqyr qosymshalar, sondaı-aq dáriger mamandardy daıarlaý týraly aqparat qoıylǵan taqyryptyq kórme boldy.