Qazaq memlekettik qyzdar pedagogıkalyq ýnıversıtetinde «Startup-Tomiris» atty jas ǵalymdardyń ınnovasııalyq jobalar baıqaýy ótti, dep ahabarlaıdy oqý ornynyń baspasóz qyzmeti.
Shara «Jastar jáne ǵylym: búgini men bolashaǵy» taqyrybyndaǵy Respýblıkalyq ǵylymı-tájirıbelik konferensııa aıasynda uıymdastyrylyp otyr.
Baıqaýdyń maqsaty – jas ǵalymdardyń jasampazdyq áleýetin damytý, olardy zamanaýı ǵylymnyń mańyzdy máselelerin sheshýge belsendi túrde tartý, ýnıversıtet bilim alýshylarynyń shyǵarmashylyq qabiletin ashý jáne ınnovasııalyq kásipkerlikke tartý. Sonymen qatar, jastardyń áleýmettik baǵyttaǵy kásipkerlik mádenıeti men kóshbasshylyq daǵdylaryn qalyptastyrý, bıznes qaýymdastyqtarymen jáne ózge múddeli taraptarmen baılanys ornatý.
Baıqaýǵa Qyzdar Ýnıversıtetiniń kúndizgi bóliminiń 1, 2, 3-kýrs stýdentteri men 1-kýrs magıstranttarynan barlyǵy 16 joba kelip túsken. Sonyń ishinde Jaratylystaný fakýltetiniń 1-kýrs stýdenti A. Sadyrbekovanyń «Jabyq jabynda ósirilgen baǵaly jemisterdi vırýssyz tásil arqyly ósirý», Jaratylystaný fakýltetiniń 2-kýrs stýdentteri Ǵ. Nurpeıisqyzy, A. Ábdimanaptyń «Jaýyn qurtyn (Lumbricus terrestris) kommersııalyq baǵytta qoldan ósirý», Jaratylystaný fakýltetiniń 2-kýrs stýdentteri D. Býlhanova, Ǵ. Týlaq pen Ǵ. Nurpeıisqyzynyń «Medısınalyq súlikti kommersııalyq maqsatta keńinen paıdalaný», Fızıka-matematıka fakýltetiniń stýdenti A. Berdiqojanyń «Turaqty kerneýdi túrlendirýge arnalǵan ınventor» jáne Pedagogıka-psıholoııa fakýltetiniń stýdentteri J. Erkequl men D. Matnııazovanyń «Bilim berý júıesin sıfrlandyrý: «Uly oıshyldardyń oı-pikirlerindegi pedagogıkalyq ıdeıalar» atty jobalary baıqaý komıssııasy tarapynan joǵary baǵa aldy. Jeńimpazdar respýblıkalyq «Startup-Bolashak» ınnovasııalyq jobalar baıqaýyna ýnıversıtet atynan qatysady jáne jobalary qazylar alqasy tarapynan úzdik dep tanylsa 200 myń teńge kólemindegi qarjylaı syıaqymen marapattalady. Al, ekinshi oryn ıegeri 100 myń teńge, úshinshi oryn ıegeri 50 myń teńgege ıe bolmaq.
Saıys «Zamanaýı fılologııalyq ǵylymdar jáne álemniń ulttyq beınesi», «Elimizdegi jáne álemdegi pedagogıka jáne psıhologııa: qazirgi teorııa jáne tájirıbe», «Qazaq qoǵamynyń sanasyn jańǵyrtý úderisindegi áleýmettik-gýmanıtarlyq bilim», «Jaratylystaný ǵylymdary: ınnovasııalyq tehnologııalar men ıdeıalar», «Sıfrlyq Qazaqstan: fızıka-matematıka ǵylymdarynyń jańa serpilisi» jáne «Jahandyq álemdegi zamanaýı qazaqstandyq mádenıet» baǵyttary boıynsha ótti.
Baıqaý qorytyndysyn shyǵarýǵa arnalǵan saraptamalyq komıssııanyń quramy QR Tuńǵysh Prezıdenti – Elbasy qory, Almaty qalasy, Almaly aýdandyq jumyspen qamtý ortalyǵy, «Damý» kásipkerlikti damytý qory» AQ, «KaznexInvest» eksporttaý jáne ınvestısııalaý boıynsha ulttyq agenttigi, «ATF Bank» AQ qyzmetkerleri men bıznes ókilderinen turady. Qazylar alqasy jobalardy ınnovasııalyq ólshemder boıynsha iriktep, belgilengen atalymdar boıynsha baıqaý jeńimpazdaryn anyqtaıdy.
– Jastardyń shyǵarmashylyq, ǵylymı-zertteý jumystaryn nasıhattaý men ony keń kólemde jarııalaýda, olardyń tulǵalyq damýdyń tásili retindegi jobalyq zertteý is-áreketterine tartýda jáne bilim berý úrdisiniń tıimdiligin kóterý men qoldanbaly ǵylymǵa degen qyzyǵýshylyqtaryn damytýda osy taqilettes jıyndardyń mańyzy zor, – deıdi shara uıymdastyrýshylary.