Bıylǵy jyldyń tamyz aıynyń ekinshi jartysynda Indonezııa astanasy – Jakarta qalasynda XVIII jazǵy Azııa oıyndarynyń alaýy tutanatyny belgili. О́kinishke qaraı, Qazaqstannyń keıbir myqty boksshylary sol jarysqa qatyspaıtyn boldy.
Kúni keshe ǵana AIBA basshylyǵy men aıtýly jarysty uıymdastyrýshylar ózara kelise otyryp, boksshylar básekesiniń baǵdarlamasyna biraz ózgeris engizýdi jón kórgen eken. Atap aıtsaq, erler arasyndaǵy saıysta ádettegideı 10 emes, nebary 7 salmaq dárejeleri boıynsha júldeler sarapqa salynady. Soǵan sáıkes, 81 keli, 91 keli jáne +91 keli salmaqtar XVIII jazǵy Azııa oıyndary baǵdarlamasynan alynyp tastaldy.
AIBA tarapynan qabyldanǵan osy tosyn ári qısynsyz sheshimdi boksshylar qaýymy áli de qabyldaı alatyn emes. Bul «ıdeıa» san mıllıon jankúıerlerge de unamady. Bapkerler de, basqalar da jaǵalaryn ustady. Qazirdiń ózinde keıbir ulttyq federasııalar ashyq túrde óz narazylyqtaryn bildirip, álemdik boks salasynyń tizginin ustaǵan azamattardan olardyń osyndaı oısyz qadamǵa barýyna ne túrtki bolǵanyn túsindirýdi talap etýde.
Joǵarydaǵy «jańashyldyq» qazaqstandyqtarǵa da jaqqan joq. Sebebi, aıtýly salmaq dárejeleri boıynsha ótetin básekelerdiń bas júldesinen basty úmitkerler qatarynda bizdiń de bylǵary qolǵap sheberleri bar. Máselen, 81 keli salmaqta Ádilbek Nııazymbetov óner kórsetýge tıis edi. Ol Olımpııa oıyndary men álem chempıonattarynda eki retten kúmis medaldi moınyna ildi. 2014 jyly Azııa oıyndarynyń jeńimpazy atandy. 91 keli salmaqtaǵy Vasılıı Levıt Rıo Olımpıadasy men Gambýrgtegi dúnıejúzilik dodada júldegerler sanatyna qosyldy. Azııa birinshiliginde úsh márte top jardy. +91 keli salmaqta Qamshybek Qońqabaev bar. Nar tulǵaly qandasymyz byltyrǵy álem chempıonatynda kúmis medal ıelendi. Mine osy sańlaqtar úshin Jakartaǵa baratyn jol jabyldy.
Ǵalym SÚLEIMEN,
«Egemen Qazaqstan»