«Nur Otan» partııasy Tóraǵasynyń birinshi orynbasary Máýlen Áshimbaev jumys saparymen Jambyl oblysyna keldi. Sapar barysynda ol oblys ákimi Asqar Myrzahmetovpen birge «Nurly jer» baǵdarlamasy boıynsha salynyp jatqan kóp páterli turǵyn úı qurylysynyń jumysymen tanysty.
Taraz qalasynyń «Avtobeket» mańynan salynyp jatqan 14 shaǵyn aýdannyń jáne Y.Súleımenov kóshesiniń sońynan salynyp jatqan 15 shaǵyn aýdannyń egjeı-tegjeıli jobasymen tanysqan M.Áshimbaev halyq úshin «Nurly jer» baǵdarlamasynyń tıimdiligin atap ótti. Máselen, 14 shaǵyn aýdannyń jalpy jer kólemi 100 gektardy quraıdy. Mundaǵy qurylys 200 kóp qabatty úı nemese 5460 páterge arnalǵan. Sondaı-aq 15 shaǵyn aýdannyń jalpy jer kólemi 362,2 gektardy qurasa, mundaǵy qurylys 280 kóp qabatty shaǵyn úıler nemese 9,0 myńǵa jýyq páterge josparlanǵan. Jalpy, jýyq arada óńirde 784 myń sharshy metr turǵyn úı el ıgiligine berilip, «7 – 20 – 25» prezıdenttik baǵdarlama boıynsha 9 myńǵa jýyq otbasyn baspanamen qamtý kózdelgen. Qurylys nysanyna arnaıy kelip, qurylysshylarmen kezdesken M.Áshimbaev Elbasynyń «Prezıdenttiń bes áleýmettik bastamasy» atty halyqqa Úndeýindegi basym baǵyttarǵa toqtalyp, atalǵan bastamalardyń el damýyna erekshe áser etetinin aıtty.
Jumys sapary barysynda «Nur Otan» partııasy Tóraǵasynyń birinshi orynbasary Taraz memlekettik pedagogıkalyq ýnıversıtetiniń oqytýshy-professorlar quramymen, ýnıversıtet stýdentterimen jáne «Jas Otan» jastar qanaty IV seziniń delegattarymen kezdesti. Onda taıaýda ǵana ótken «Jas Otan» jastar qanatynyń IV sezi elimizdegi jastar saıasatynyń damýyna tyń serpin bergeni aıtyldy. Atalǵan sezd aıasynda «Rýhanı jańǵyrý», «Sıfrly Qazaqstan», «Qazaqstanda jasalǵan», «Bilim. Ǵylym. Innovasııa» jáne «Salamatty ult» taqyrybyndaǵy 5 paneldik sessııa ótken bolatyn. Nátıjesinde munda kóptegen ıgi bastamalar kóterilip, tyń usynystar aıtylǵan edi. Osy oraıda M.Áshimbaev elimizdiń bas partııasy tarapynan jastarǵa arnalǵan jańa jobalar qolǵa alynǵanyn aıtty.
Sondaı-aq kezdesý barysynda «Nur Otan» partııasy Tóraǵasynyń birinshi orynbasary «Qazaq tilindegi 100 jańa oqýlyq» jobasy aıasynda jaryq kórip, qalyń oqyrmanǵa jol tartqan 18 oqýlyq jaıynda da keńinen áńgimeledi. О́z sózinde M.Áshimbaev jastarǵa Elbasynyń «Prezıdenttiń bes áleýmettik bastamasy» atty Úndeýin túsindirip berdi. Sonymen qatar úkimettik emes uıym ókilderimen, Áýlıeata óńiriniń zııaly qaýymymen jáne «100 jańa esim» jobasynyń qatysýshylarymen júzdesken M.Áshimbaev elimizde bastaý alǵan ıgi bastamalar jaıyna toqtaldy.
Sondaı-aq «Nur Otan» partııasy Tóraǵasynyń birinshi orynbasary «Rýhanı jańǵyrý» óńirlik keńsesine arnaıy baryp, atalǵan baǵdarlama boıynsha atqarylyp jatqan jumystarmen tanysty. О́z kezeginde partııanyń oblystyq fılıalynyń HHI konferensııasyna qatysyp, partııa aldynda turǵan basym baǵyttar jóninde áńgimeledi. Sonymen qatar óńirde partııa jumysyn odan ári jandandyrý kerektigin sóz etip, «Prezıdenttiń bes áleýmettik bastamasyn» halyqqa túsindirip, ony júzege asyrýda jambyldyqtardyń belsendilik tanytýy kerektigin aıtty. Konferensııa barysynda Jambyl oblysynyń ákimi Asqar Myrzahmetov «Nur Otan» partııasy Jambyl oblystyq fılıalynyń tóraǵasy bolyp saılandy.
Hamıt ESAMAN,
«Egemen Qazaqstan»
Jambyl oblysy