Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda Atyraý oblysynda ótken jyly 118 joba júzege asyryldy. 1000-ǵa jýyq is-shara uıymdastyryldy.
«Atameken» kishi baǵdarlamasy aıasynda «Asar» úshjaqty áriptestik respýblıkalyq forýmy ótip, óńirdegi qoǵamdyq sektordyń damýyna úlken serpilis berdi.
«Týǵan jerge taǵzym» jobasynyń aıasynda oblystyń aýdandarynda jerlester forýmdary ótip, 6 balabaqsha men 8 sport kesheni paıdalanýǵa berildi. Atyraý munaı jáne gaz ýnıversıtetinde Balǵymbaev ǵylymı ortalyǵynyń qurylysy júrýde.
«Rýhanı qazyna» kishi baǵdarlamasy boıynsha óńirge el zııalylary shaqyrylyp, shyǵarmashylyq jobalar júzege asty. Asanáli Áshimov, Myrzataı Joldasbekov, Nurlan Orazalın, Ǵafız Esimov, Altynbek Qorazbaev, Quman Tastanbekov pen Merýert О́tekeshova, Aıgúl Úlkenbaeva, Bolat Qohamanov, Tatıana Býrmıstrova sekildi ádebıet, óner tulǵalarynyń shyǵarmashylyq keshteri men konsertteri atyraýlyqtarǵa umytylmas áser syılady.
– Elimizde alǵash ret Arqa, Batys, Syr, Jetisý jáne Altaı-Tarbaǵataı án mektepterin bir arnaǵa toǵystyrǵan «Án darııa dúldúlderi» I respýblıkalyq dástúrli ánshiler baıqaýy, «Máńgilik eldiń altyn adamy» atty respýblıkalyq teatrlar festıvali, «Qaıta jańǵyrǵan Qazaqstan» taqyrybynda halyqaralyq aqyndar aıtysy, «Jaıyq nury» respýblıkalyq akademııalyq ánshiler baıqaýy, D.Nurpeıisova atyndaǵy «Bulbul dombyra» respýblıkalyq qyz-kelinshekter baıqaýy da «Rýhanı jańǵyrý» baǵdarlamasynyń aıasynda uıymdastyryldy, – deıdi oblys ákiminiń orynbasary Nursáýle Saılaýova.
О́lke tarıhyn zerdeleýge arnalǵan «Ibn Batýtanyń Uly Jibek jolymen saıahaty: mádenıetter arasyndaǵy dıalogty alǵa bastyrý» taqyrybyndaǵy halyqaralyq ǵylymı-praktıkalyq konferensııasy, «Nur Otan» partııasynyń bastamasymen júzege asqan «Aqmeshit – Beket ata» ekspedısııasy arqyly biraz jańa málimetter jınaldy.
Oblystyń arhıv qujattary men tarıhı-mádenı eskertkishterin zertteý jáne qorǵaý jumystarynyń mamandary Reseıdiń Máskeý, Sankt-Peterbýrg, Astrahan, Orynbor qalalary men Tatarstan, Bashqurtstan respýblıkalarynyń memlekettik arhıvterinen elimizdiń tarıhyna qatysty qujattardy izdestirý maqsatynda ǵylymı is-saparlarda boldy. Nátıjesinde, «Kaspıı mańy qazaqtarynyń mádenıeti men turmysy: HH ǵasyrdyń 20 jyldaryndaryndaǵy fotoqujattarda» atty kitap-albomy jaryqqa shyqty.
– О́ńirde kólemdi arheologııalyq qazba jumystary júrgizildi. Naqty aıtqanda, Mııaly qorǵandary, Saraıshyq jáne Aqtóbe-Laetı ortaǵasyrlyq qalashyqtaryna ǵylymı arheologııalyq zerdeleý jumystary jasaldy, – deıdi oblys ákiminiń orynbasary Nursáýle Saılaýova. – Ulttyq sport túrlerin damytý maqsatynda I respýblıkalyq «Daraboz» jappaı kókpar saıysy ótti. Demeýshiler esebinen oblys ortalyǵynda «Retro» saıabaǵy ashyldy. Elimizdiń uly ǵalymdaryn nasıhattaý maqsatynda «Aǵartýshylar» kóp serııaly tarıhı-derekti fılmi túsirildi. Munyń bári «Rýhanı jańǵyrý» baǵdarlamasynyń ıgiligi.
«Qazaqstannyń kıeli jerleriniń geografııasy» jobasyna oblystan 7 nysan engizildi. Olar: Saraıshyq qalashyǵy, Aqmeshit, Ushqan ata jáne M.О́temisulynyń keseneleri, Araltóbe qorymy, Qulshan ata jer asty meshiti jáne Imanqara úńgiri.
Atyraý oblysy ákimdigi Mádenıet jáne sport mınıstrligimen birlese kóne Saraıshyq qalasyn saqtap qalý, zertteý jáne ózen jaǵasyn bekitý boıynsha aýqymdy jobany júzege asyra bastaǵanyn aıta ketken jón. Bul jumystarǵa jergilikti bıýdjetten 1,6 mlrd teńge bólindi. Bıyl jumys aıaqtalyp, qalashyq ornyna etnomádenı mýzeı kesheni salynady, osy arqyly ishki jáne syrtqy týrızmniń damýyna keń jol ashylmaq.
«Jahandaǵy zamanaýı qazaqstandyq mádenıet» arnaıy jobasy aıasynda óńirdegi shyǵarmashylyq ujymdar qazaqstandyq mádenıetti álemge tanytý maqsatynda Úndistan, Makedonııa, Portýgalııa, Malaızııa, Reseı, Túrkııa, Vengrııa, Serbııa memleketterinde óner saparynda boldy.
«Latyn álipbıine kóshý» arnaıy jobasy boıynsha turǵyndarǵa aqparattyq túsindirý jumystary júrgizilip, sarapshylar toptarynyń qatysýymen 300-den asa is-shara uıymdastyryldy.
Osyndaı ıgi jumystar qatary bıyl da jalǵasyn taýyp jatyr. Oblys ákiminiń orynbasary N.Saılaýovanyń aıtýynsha, «Rýhanı jańǵyrý» aıasynda 2018 jyly 6,1 mlrd teńgege 175 joba josparlanǵan. 500-ge jýyq is-shara uıymdastyrylyp, 300 myńnan asa adam qamtý kózdelýde.
Baqytgúl BABASh,
«Egemen Qazaqstan»
ATYRAÝ