Aqparat jáne kommýnıkasııalar mınıstri Dáýren Abaev «Tele radıo habarlaryn taratý týraly» zańǵa sáıkes memleket jarty jyl kóleminde efırlik sıfrlyq tele radıo habar taratýǵa aýysýdyń ýaqytyn belgileýi qajet», dep vıdeo málimdeme jasady.
Aqparat jáne kommýnıkasııalar mınıstrligi efırlik sıfrlyq tele radıo habar taratýǵa aýystyrý jumystaryn júrgizip jatqanyn jetkizgen mınıstr eń aldymen sıfrlyq televıdenıege anyqtama berdi.
«Sıfrlyq televıdenıege – vıdeobelgi men dybys taratýdyń joǵary sapasy. Sondaı-aq, vızýaldy kedergilerdi joıyp, efırde tunyq daýysty qamtamasyz etý. Osylaısha otandyq telearnalardy aqysyz, sıfrlyq sapada tamashalaý múmkindigi», dedi D.Abaev.
Mınıstrdiń aıtýynsha, sıfrlyq televıdenıe júıesine kóshý arqyly iri qalalar men oblys ortalyqtaryn bylaı qoıǵanda, shalǵaı eldimeken turǵyndarynyń ózi 15 otandyq telearnaǵa deıin tamashalaı alady.
«Astana men Almaty qalalarynda jáne oblys ortalyqtarynda 30 arnaǵa deıin kórýge bolady. Kezinde elimizdiń eń shalǵaı eldimekenderi men turǵyndar az qonystanǵan aýyldarda 2-3 arna ǵana kórýge múmkindik bar edi. Endi 15 otandyq telearnany joǵary sapada tamashalaıtyn bolady. Sıfrlyq habar taratýdy engizý – qala men aýyl arasyndaǵy aqparattyq alshaqtyqty tómendetedi. Analogty habar taratý kezeń-kezeńmen toqtatylady», degen D.Abaev týra alty aıdan soń Mańǵystaý oblysy tolyq sıfrly habar taratýǵa kóshetinin, al eki jyl ishinde ózge aımaqtar da sıfrly habar taratýmen qamtamasyz etiletinin jetkizdi.