Qaraǵandy oblystyq ákimdiginde ótken jıynda «Saryarqa» magıstraldy gaz qubyrynyń qurylysy» jobasyn ázirleýshiler usynǵan negizgi tehnıkalyq sheshimder talqylandy. Gaz magıstraliniń basym bóligi Qaraǵandy oblysy arqyly ótetindikten, búginde aımaqtaǵy birqatar máseleler sheshimin taýyp jatyr.
– Qazirgi tańda «Saryarqa» magıstraldy gaz qubyrynyń qurylysy» jobasyn júzege asyrý boıynsha belsendi jumys júrgizilýde. Búgingi kúnge deıin tehnıkalyq-ekonomıkalyq negizdeme ázirlendi, memlekettik saraptamanyń oń qorytyndysy alyndy. Sondaı-aq jobalaý-smetalyq qujattamalardy ázirleý aıaqtalý kezeńine jaqyndady, – dep málimdedi «QazTransGaz» AQ bas dırektorynyń orynbasary Serikqalı Brekeshev.
«QazTransGaz» AQ jobanyń tapsyrys berýshisi bolyp tabylady, tehnıkalyq-ekonomıkalyq negizdeme ázirleýshi retinde «KATEK» JShS konsorsıýmy tańdalǵan. Negizgi tehnıkalyq sheshimderdi jınalys barysynda jobalaý uıymynyń bas dırektory Qundyz Nupov tanystyrdy.
Naqtylanǵan málimetter boıynsha, magıstraldy gaz qubyrynyń Astanaǵa deıingi uzyndyǵy 1063 shaqyrymdy quraıdy, onyń 764-i Qaraǵandy oblysyna tıesili.
– Jer máselelerine, ınfraqurylymǵa qatysty negizgi jumys Qaraǵandy oblysymen baılanysty bolady, – dep atap ótti baıandamashy. – Qurylys eki kezek boıynsha júrgiziledi. Birinshisi Astanaǵa gaz berýmen aıaqtalady. Ol jumystardyń ishine qubyrlardy tóseý jáne gazben qamtý júıesin salý kiredi. Birinshi kezek 2018-2019 jyldardy qamtysa, qurylystyń ekinshi kezegi 2019-2020 jyldarǵa dep josparlanǵan.
Birinshi kezektiń quny 264,4 mlrd teńgeni quraıdy. Gaz qubyrynyń biregeıligi – onyń 100 atmosfera qysymǵa shydaı alatyndyǵynda.
– Avtomattandyrylǵan gaz taratý stansalary Qaraǵandy oblysynyń úsh qalasynda – Jezqazǵan, Qaraǵandy jáne Temirtaýda ornalasatyn bolady. Sonymen qatar aýdandarǵa arnalǵan áleýetti AGTS-ke qajetti 5 burma bolady, olardy daıyn bolýyna qaraı iske qosyp otyrady, – dedi Qundyz Nupov. – Gazben Qaraǵandy oblysynyń 119 eldi mekeni qamtylatyn bolady.
Aımaq ekonomıkalyq, ekologııalyq jáne áleýmettik tıimdilikke ıe bolady, dep atap ótti ol. Esepteýler boıynsha, jyl saıynǵy ınvestısııalar 10-15 mlrd teńgege deıin jetedi. Gaz qubyryn salýda paıdalanylatyn qurylys materıaldaryn shyǵaratyn qaraǵandylyq kásiporyndar tańdalyp jatyr. Jobany júzege asyrý qosymsha jumys oryndaryn qamtamasyz etedi: 2000-ǵa deıin adam qurylys kezinde jumysqa tartylady. Sonymen qatar 1000-ǵa jýyq jumysker gaz qubyrynyń qyzmet etýin qamtamasyz etý úshin qajet bolady.
Oblys ákimi Erlan Qoshanov qaramaǵyndaǵy qyzmetkerlerge jedel túrde jáne barynsha jaýapkershilikpen jobalaýshylarmen birlesip, týyndaǵan máselelerdi der ýaǵynda sheship otyrýdy tapsyrdy.
– Gaz qubyrynyń qurylysy – Elbasynyń bes áleýmettik bastamalarynyń biri. Bul aýqymdy jumys. Bul jobany bizdiń turǵyndar, kásipkerlerimiz taǵatsyzdana kútti. Gaz – ol bizdiń aımaǵymyzdyń áleýmettik-ekonomıkalyq damýyndaǵy jańa qural. Bul jobany júzege asyrý turǵyndardyń ómir sapasyn joǵarylatýǵa jol ashady, – dep atap ótti Erlan Qoshanov.
О́ńir basshysy sonymen qatar jobanyń júzege asyrylýyna qatysty máselelerdi udaıy baqylaýda ustaıtynyn jetkizdi.
Qaırat ÁBILDA, «Egemen Qazaqstan»