Sońǵy kezde Kókshetaý qalasy abattandyrylyp, jańadan salynǵan nysandarmen tolyqty. Endi mine, kezek qalalyq qoǵamdyq kólikterge de kelip jetti. «Kókshetaý qalasyndaǵy jolaýshy tasymaly kólikterin jańartý» jobasy sheńberinde avtobýs parki ekologııalyq taza kógildir otynmen júretin jańa avtobýstarmen tolyǵatyn boldy.
Bıylǵy jyldyń 23 sáýirinde Aqmola oblysy ákimdiginiń qoldaýymen jáne «Global Gas Group» gaz-motorly kompanııasy ókilderiniń qatysýymen, «Kókshetaý avtobýs parki» JShS bastamasymen qazaqstandyq «SaryarkaAvtoProm» kompanııasy shyǵarǵan «Ankai», reseılik óndirýshilerdiń KAVZ-4270, «Volgabus Sıtırıtm» jáne qytaılyq «Golden dragon XML6105CR» markaly 4 avtobýs testilik rejimde baǵyttarǵa shyǵarylǵan bolatyn. Aıta ketý kerek, bul avtobýstardyń barlyǵy da kógildir otynmen (metan) júredi. Qazirgi tańda atalǵan avtobýstar qalaishilik baǵyttar boıynsha júredi. Testilik rejim sáýirdiń 29-yna deıin jalǵasatynyn eskersek, osy ýaqyt ishinde jańa avtobýstarǵa mingen jolaýshylar úshin jolaqy tegin bolady.
Ábden tozyǵy jetken, onyń ústine qala ekologııasyn lastap kelgen eski kólikterdiń 50 paıyzdaıyn avtobýstardyń jańa túri aýystyrady. Qalanyń avtobýs parkteri men Qazaqstannyń soltústik óńirlerin tabıǵı gazben júretin avtobýstarmen qamtamasyz etip kele jatqan jalǵyz «Global Gas Group» kompanııasy arasyndaǵy yntymaqtastyqqa sáıkes ekologııalyq taza gaz-motorly otynmen qamtamasyz etetin bolady. Qala aýmaǵynda avtomobıldik kógildir otyndy jınaqtaıtyn kompressorlyq stansanyń ornatylýy kúnine 70-ke tarta qalalyq avtobýsty joǵary sapaly gaz-motorly otynmen qamtamasyz etýge jetedi eken. Atalǵan avtobýstarda tabıǵı gazdy paıdalaný dızel otynymen salystyrǵanda 50 paıyzdaı únemdeýge múmkindik beredi jáne «Eýro 5» standartyna saı.
Asqar TURAPBAIULY, «Egemen Qazaqstan»
Aqmola oblysy