Velojarysqa qatysýshylar Sultan Beıbarys alańynda márege jetti, dep habarlaıdy Atyraý oblystyq óńirlik kommýnıkasııalar qyzmeti.
Atyraýda «Bike Ride Atyrau – 2018» qaıyrymdylyq velojarysynyń qortyndysy shyqty. Shara Aleksandr Vınokýrovtyń qoǵamdyq qory, Atyraý sportyn damytý men qoldaý qoǵamdyq qory, Atyraý oblystyq ákimdiginiń qoldaýymen uıymdastyryldy.
«Osy sharadan keıin bizdiń óńirdegi velosport burynǵydan da belsendi damıdy degen oıdamyz», deıdi Atyraý oblysy ákiminiń orynbasary Saǵyndyq Luqpanov.
Atyraýdyń ortalyq kóshelerimen 1500 velosıpedshi júrip ótti. Jarysqa eki olımpıada chempıony – Aleksandr Vınokýrov pen Ilıa Ilın qatysty.
«Onlaın tirkeýden 900-den astam qatysýshy ótken edi, jarys bastalar aldynda drama teatr aldyndaǵy sórede 600 adam taǵy da tirkeldi», deıdi uıymdastyrýshylar.
Velojarysty qoldaýǵa astanalyq «Astana Pro Team» komandasy arnaıy keldi.
«Qatysýshylar osynsha kóp bolady dep oılamadym. Qaıyrymdylyq aýksıony keshke ótedi, sol jerde 4 kolleksııalyq velosıped pen bizdiń komandanyń aksessýarlary oınatylady», deıdi Aleksandr Vınokýrov.
Velojarys qortyndysy boıynsha jeńimpazdar bes atalymda anyqtaldy: eń jasy úlken qatysýshy 66 jastaǵy Ǵımran Aqbotın, eń jas qatysýshy 4 jastaǵy Aııa Salamat dep tanyldy. Alty adamnan quralǵan Bısalıevter otbasy "Sportshylar otbasy" atalymyn jeńip aldy. Eń kreatıvti velosıpedtiń ıesi Baqytjan Shaıhıev bolsa, Marat Naýryzǵalıevke eń kreatıvti kıimi úshin júlde berildi. Barlyq júldegerler syılyqqa velosıped aldy.
Jeńimpazdardy marapattaý sharasynan keıin Sultan Beıbarys alańynda qazaqstandyq estrada juldyzdarynyń qatysýymen merekelik konsert ótti. Baǵdarlama arnaıy osy sharaǵa oraı jazylǵan ánuranmen qortyndylandy.