Atyraýda qysqy sport túrleri jaqsy damyp keledi. Oblystyq dene shynyqtyrý jáne sport basqarmasynyń basshysy Azamat Bekettiń aıtýynsha, óńirde 3 pen 14 jas aralyǵyndaǵy 60 bala mánerlep syrǵanaýmen aınalysady.
Jas sportshylarǵa mánerlep syrǵanaýdyń qyr-syryn Olımpııa oıyndarynyń júldegeri Denıs Tenniń ózinen úırenýge múmkindik týdy. Muz aıdynynda ótken sheberlik synybyn 500-den astam atyraýlyq kelip tamashalady.
– Balalardyń mánerlep syrǵanaýǵa degen qulshynysyna rıza boldym, – deıdi Denıs Ten. – Oblys basshylyǵy tarapynan sportqa oń kózqaras bar eken. Balalarǵa sapaly jattyǵý jumystaryna qajet jaǵdaıdyń bári jasalǵan. Osy sheberlik synyby jas sportshylarǵa jiger beredi degen senimdemin.
Kezdesýde atyraýlyq mánerlep syrǵanaýshylar Olımpıada júldegeri aldynda ónerlerin kórsetip, baǵyt-baǵdar aldy. Atyraýdaǵy muz saraıynda oqýshylar mánerlep syrǵanaýdy tegin úırenedi. Olar túrli deńgeıdegi jarystarda oza shaýyp báıge alyp júr.
Baqytgúl BABASh,
«Egemen Qazaqstan»
ATYRAÝ