Mamyrdyń 2-si men 4-i aralyǵynda Aqtaý qalasyndaǵy Nazarbaev Zııatkerlik mektebindegi «Telestýdııa» úıirmesiniń oqýshylary «Kóktem» atty fotokórme uıymdastyrdy. Olar atalǵan kórmeni №7 N.Marabaev atyndaǵy mektep lıseıinde jáne zııatkerlik mektepte ótkizdi. Kórmeni oqýshylar, ustazdar, ata-analar, oblys turǵyndary tamashalady.
-Telestýdııa úıirmesine 2017 jyldyń jeltoqsanynda «NKOK» kompanııasynyń qaıyrymdylyq baǵdarlamasy boıynsha demeýshilik kómek jasalyp, stýdııaǵa qajetti Canon EOS 5D Mark III Body kásibı fotoapparaty men kameranyń erkin qozǵalýyna múmkindik beretin DJI Ronin-M turaqtandyrǵysh (stabılızator) alyp berilgen bolatyn. Atalǵan shara bizge syılanǵan tehnıkanyń múmkindigin jáne oqýshylardyń foto túsirýdegi qabiletterin kórsetý úshin uıymdastyrylyp otyr, deıdi úıirme jetekshisi Rysgúl Ramazanova kórme týraly.
Oqýshylar kórmege 22 erekshe sýret qoıdy. Olar «Mektep ómiri», «Portret» jáne «Kóktem» serııasyndaǵy fotolardan turdy. Úıirme qatysýshylary ár fotonyń túsirilý tarıhy men ózgeshe mańyzy bar ekenin aıtady.
-Fotokórmege qoıylǵan sýretterdiń deni kóktem ýaqytynda túsirilgen. Bizder mektep ishindegi mańyzdy sharalardy fotoǵa jáne vıdeoǵa túsirip, arnaıy vıdeoreportajdar daıyndaımyz jáne mekteptiń medıaarhıvin qalyptastyrýǵa atsalysamyz. Úıirmedegi dostarmmen bul kórmege jarty jyl daıyndaldyq. Rasyn aıtqanda, bul bizdiń oqý jylyndaǵy atqarǵan jumystarymyzdyń esebi ispettes, deıdi jas fototilshi Dıana Maratqyzy.
Uıymdastyrýshylardyń aıtýynsha, qazirgi tańda fotoǵa túsirý quraldarynyń múmkindikteri damyǵanmen, barlyǵy shynaıy ádemilikti kórsete almaıdy. Sol úshin de balalar fotokórmeni jıirek ótkizýdi josparlap otyr. Sondaı-aq, zamanaýı qurylǵylardyń kómegimen úıirme tárbıelenýshileri 2017 jyldyń aqpan aıynda «Qazaqstan balalary sheksiz álemde» atty kınofestıvalinen ár túrli nomınasııa boıynsha bes júldege ıe bolǵan.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy