Sharany Qostanaıdaǵy Steppe Riders MCC motoklýby uıymdastyrdy. Motoáýesqoılary aldymen qaladaǵy "ABC” avtoáýesqoılar mektebiniń oqý-tájirıbe alańyna jınaldy, olarǵa jol erejesin saqtaý jáne motosıkldi aıdaý týraly sabaq jáne sol jóninde baıqaý ótti.
Sharanyń ekinshi bóliginde motosıkl áýesqoılary Qostanaı ortalyq dańǵyldarymen qalanyń ekinshi shetine deıin júrip ótti. Steppe Riders motoklýbynyń prezıdenti Aleksandr Nam sharaǵa qatysqan motoáýesqoılaryn quttyqtady jáne saparǵa shyǵar aldynda jol-qozǵalys erejesin taǵy da eske saldy.
«Mundaı aksııany ótkizýimizdiń maqsaty motosıkl aıdaýǵa áýes jastardyń esine bul kóliktiń qaýipsizdigin taǵy bir eske salý boldy. Sonymen qatar avtomobıl júrgizýshilerge kún jylyǵan soń, kóshege motosıkl áýesqoılarynyń shyqqanyn, olarǵa da jol-kólik erejesin buzbaýdy eskertý bolatyn. Bul da jol erejesine saq bolýdy, jol-kólik oqıǵasynyń aldyn alýǵa septigin tıgizedi dep oılaımyz», dedi Aleksandr.
Motoáýesqoılar sharasyna qatysý úshin oblystyń ózge de qalalarynan motosıklshiler keldi.
– Rýdnyı qalasynan 15 motoáýesqoılary keldi.Rýdnyı qalasynda motoáýesqoılary kóp. Olardyń kópshiligi nıet bildirgen sharaǵa bul joly kele almady. Biraq rýdnyılyqtar Qostanaıda ótetin sharaǵa jyl saıyn qatysyp otyrady, – dedi Dmıtrıı Salmın.
50-den asa motoáýesqoılary qaladaǵy Abaı, Gashek, Maıakovskaıa, Qaıyrbekov kóshelerimen júrip otyryp, fınalǵa jetti.
Názıra Járimbet
«Egemen Qazaqstan»
Qostanaı