Almaty oblysynda 9 mamyr merekesi atalyp ótti. Taldyqorǵandaǵy Dańq obelıskisine gúl shoqtaryn qoıýdan bastalǵan sharalar legi «Jastar» saıabaǵynda jalǵasty. Munda jınalǵandar nazaryna «Urpaqtar umytpaıtyn Uly Jeńis» atty teatrlandyrylǵan kórinis usynyldy.
Ardaqty ardagerler men jınalǵan qaýymdy 9 mamyr merekesimen oblys ákiminiń birinshi orynbasary L. Turlashov quttyqtady.
- Búgin batyrlyq pen janqııarlyq erliktiń, birlik pen tatý tirliktiń merekesi –Jeńis kúnine 73 jyl tolyp otyr. Barshańyzdy osy aıtýly merekemen shyn júrekten quttyqtaımyn! Elbasymyz Nursultan Ábishuly Nazarbaev «Aǵa urpaqtyń jeńisi men búgingi bizdiń jetistigimiz – bir-birimen tyǵyz baılanysty. Eger aǵa býynnyń erligi bolmaǵanda, biz mundaı memleket qura almas edik», - dep erekshe atap kórsetti. Bul surapyl soǵysqa 1 mıllıon 800 myń qazaqstandyq attanyp, sonyń teń jartysy qan maıdannan qaıtpady. Búgin qasymyzda júrgen soǵys ardagerleri – bizdiń maqtanyshymyz. Olar Otan qorǵaý jolynda naǵyz patrıotızmniń úlgisin kórsetti. Aǵa býyn jastardy tárbıelep, elimizdiń ósip-órkendeýi úshin atsalysty. Ardagerlerge barynsha qamqorlyq jasaý – bizdiń qasıetti boryshymyz, - dep atap ótti ol óz sózinde.
Saıabaqta dástúrli «Dala ashanasy» qoıylyp, soǵys jáne eńbek ardagerleri soldat botqasynan dám tatty. Sahna tórinen oblystyń ónerpazdar ujymy maıdan ánderin shyrqap, patrıottyq rýhqa shaqyrdy. Sharaǵa arnaıy shaqyrylǵan áıgili ánshi Álibek Dinishev jetisýlyqtardyń merekelik kóńil kúıin kóterip, áýelete án saldy.
Sondaı-aq, «Taldyqorǵan» ıppodromynda mereke qurmetine oraı ulttyq at sporty túrlerinen respýblıkalyq dúbirli jarys ótti.
Qalmahanbet MUQAMETQALI,
«Egemen Qazaqstan».
Almaty oblysy.