Uly Jeńis merekesi qarsańynda Besqaraǵaı aýdanynyń Baskól aýylynda memorıaldyq eskertkish ashyldy.
Bıiktigi 7, eni 10 metrdi quraıtyn, mármardan jasalǵan taqtaǵa jergilikti maıdangerlerdiń esimi qashap jazylǵan monýmenttiń ashylý rásimine soǵys jáne tyl ardagerleri, alys-jaqynnan arnaıy kelgen qonaqtar men aýdan ákimi Dáýlet Batyrbaev qatysty.
Sonymen qatar bul kúni «Ákeler rýhyna taǵzym» atty kitaptyń tanystyrylymy ótkizildi. Rýslan Nasyrov pen Lıýsııa Hamıtova birlese jazǵan eńbekte baskóldikterdiń maıdandaǵy erlikteri baıandalady.
Reti kelgende aıta keteıik, ekinshi dúnıejúzilik soǵysqa Baskól men Qaraqudyq aýyldarynan 300 azamat attansa, sonyń 84-i elge oralmaǵan. Joǵaryda atalǵan taqtaǵa osy 300 jaýyngerdiń esimi jazylǵan.
«Tórtkúl dúnıeni dúr silkindirgen qandy qasapqa meniń ákem Adyhan Baıkanov pen inisi Ahtan Baıkanov ta attanyp, maıdan dalasynda qaza tapty. Tek bir inisi Qadyr Baıkanov aman-esen elge oraldy. Baskól orta mektebinde soǵys ardagerlerine arnalǵan mýzeı bar. Jas urpaq atalarynyń erligi men órligin bilip ósse, Otanyna adal qyzmet eteri anyq», - deıdi tyl ardageri Marvatjan Baıkanov.
Shara sońynda Astananyń 20 jyldyǵyna oraı eskertkishtiń mańyna 20 túp shyrsha kóshetteri otyrǵyzyldy.
Azamat QASYM,
«Egemen Qazaqstan»
Besqaraǵaı aýdany,
Baskól aýyly