Elbasy Jetisý óńirindegi jumys jaǵdaıymen tanysty

Qazaqstan Prezıdenti Almaty oblysynyń Úsharal qalasyna kelgennen keıin jańa áýejaıdyń qyzmetimen jáne oblystyń shaǵyn avıasııa salasyn damytý perspektıvalarymen tanysty.

Alakól aýdanynyń Aqshı kenti stansasyndaǵy temir jol vokzalynyń jańa ǵımaratyn aralap kórgen soń, Memleket basshysynyń tóraǵalyǵymen elimizdiń týrızm salasyn jáne kólik-logıstıka ınfra­qu­ry­lymyn damytý máseleleri jó­nin­de keńes ótti.

Jıyn barysynda óńir bas­shysy Amandyq Batalov Nur­sultan Nazarbaevqa Almaty ob­ly­syn­daǵy týrızmniń damý barysy jó­ninde baıandady.

– Sońǵy tórt jylda oblysta týrıstik qyzmet kórsetý kólemi eki ese artty. Bul kórsetkish 2014 jyly 3,9 mıllıard teńgeni qurasa, 2017 jyly 8,3 mıllıard teńgege ósti. 2018 jyly muny 10 mıllıard teńgege deıin jetkizýdi josparlap otyrmyz. Alakól aý­danynda kórsetilgen qyzmet kó­le­mi 2017 jyly 3,5 mıllıard teń­gege jetip, 2014 jylǵy deńgeımen salystyrǵanda 8 ese artty, – dedi Almaty oblysynyń ákimi.

Investısııalar jáne damý mınıstri Jeńis Qasymbek «Nurly jol» ınfraqurylymdy damytýdyń memlekettik baǵdar­la­masynyń jergilikti jáne res­pýblıkalyq mańyzy bar avtomobıl joldaryn salýǵa qatysty bóliginiń iske asyrylý barysy jóninde baıandady.

– 2017 jyly respýblıkalyq mańyzy bar 4 myń shaqyrymnan astam avtomobıl jolyna jón­deý jumystary júrgizildi. So­nyń ishinde 603 shaqyrym jol paı­dalanýǵa berildi. Jalpy, 2022 jylǵa deıin 24 myń shaqy­rym joldyń barlyǵy bir qalyp­qa keledi degen oıdamyz, – dedi In­ves­tısııalar jáne damý mınıstri.

Sondaı-aq, keńeste «Qazaqstan temir joly» UK» AQ prezıdenti Qanat Alpysbaev Memleket bas­shysyna Alakól demalys aıma­ǵynyń 2020 jylǵa deıingi kólik­tik qoljetimdi kartasyn tanystyryp, tranzıttik tasymaldaý isin damytý strategııasynyń júzege asyrylýy barysy jóninde baıan­dady.

Mádenıet jáne sport mınıstri Arystanbek Mu­ha­medıuly ishki jáne syrtqy týrızmdi damytý jolynda barlyq kedergilerdi alyp tas­taý maqsatymen Qazaqstan halqyna arnalǵan Joldaýda aıtylǵan tapsyrmalardyń iske asyrylýy, sonymen qatar EKSPO-nyń jaǵymdy áserin qoldaý úshin mınıstrlik tarapynan atqarylyp jatqan sharalar jóninde baıandady.

– Elimiz týrızmniń ekonomıkalyq áserin is júzinde EKSPO-ny ótkizý barysynda sezindi. Sol kezde Qazaqstanǵa 7 mıllıonnan astam týrıst keldi. Bul ótken jylmen salystyrǵanda 18 paıyzǵa kóp. Ishki týrızm legi 20 paıyzǵa artyp, shamamen 6 mıllıon adamǵa jetti, – dedi vedomstvo basshysy.

Keńes qorytyndysy bo­ıynsha jáne týrıstik klas­ter nysandaryn aralaǵannan keıin Nursultan Nazarbaev Qazaqstannyń týrızm salasyn odan ári damytý úshin ortalyq memlekettik jáne jergilikti atqarýshy organdarǵa birqatar tapsyrma berdi.

– Alakól Qazaqstan boıynsha eń kóp demalýshy baratyn jerge aınalýy kerek. Ol yńǵaıly jerde ornalasýymen erekshelenip, barlyq óńirdiń turǵyndary úshin qoljetimdi bolyp otyr. Kóldiń biregeıligi sýynyń emdik qasıetine baılanys­ty. Onyń quramynda radon, sil­ti jáne basqa da paıdaly ele­mentter bar. Osyǵan baıla­nys­ty Alakól elimizdiń týrızm salasy úshin óte mańyz­dy, – dedi Memleket basshysy.