Aýdan ortalyǵy Baıanaýyl men Maıqaıyń kentiniń arasy 85 shaqyrym. Kentten tańǵy saǵat 5 te jaıaý júgirip shyqqan Oljas Kákimjanov Baıanaýylǵa keshki saǵat 4 te jetti.
Júgirý barysynda tórt ret qana aıaldapty. Áriptesi Danııar Táshimov kólikpen sońynan ilesip, júrip otyrǵan. Toraıǵyr aýylynyń burylysynan shákirti Baqtııar Táshimov ustazynyń qataryna qosylady. Aýdan ortalyǵynda Oljasty aýdan ákimdiginiń bólim qyzmetkerleri, jastar qarsy aldy. Oljas jeńil atletıkaǵa bala kezinen bastap qyzyqqan eken. Ásker qatarynda júrip te jyldamdyqqa júgirýden jaqsy nətıje kórsetipti. Qazir Maıqaıyń kentindegi orta mekteptke deneshynyqtyrý páninen sabaq beredi. Jas maman sporttyń ár túrine oqýshylaryn úıretip júr.
Aýdandyq sport bóliminiń habarynsha, Oljas aýdanda ótkiziletin sporttyq jarystarǵa jıi qatysady. Aqpan aıynda Maıqaıyń kentinde aýdannyń aýyldyq aýmaqtary arasynda sporttyń olımpıadalyq, ulttyq jáne halyqtyq túrleri boıynsha XXI aýdandyq keshendi spartakıadasy ótken. Aýyl sportshylary nysanany myltyqpen atý, kúshti jetildirý jattyǵýlary men qashyqtyǵy 5 jáne 3 shaqyrymdaǵy shańǵy jarysyna qatysty. Shańǵy tebý jarysynda Oljas eki jyl qatarynan 2-shi oryn ıelenipti. Mektepte ataýly mereke kúnderi muǵalimder arasynda da sporttyq jarystar ótedi. Jarystar júgirý, sekirý, kedergilerden ótý, doppen júgirý, arqan tartý túrlerine arnalady. Jeńil atletıkadan basqa qazaq kúresimen de aınalysady.
- Bul júgirgen jolymdy jalpy, mamyr merekelerine arnadym. Maqsatym sportty nasıhattap, salaýatty ómir saltyna jurtshylyqtyń nazaryn aýdarý, jastardyń sanasyna sportpen aınalysý qajettigin qalyptastyrý, - deıdi Oljas Kákimjanov.
Farıda BYQAI, «Egemen Qazaqstan»
Pavlodar oblysy