Tarazdyq dárigerler alǵash ret júrektiń sol jaǵyn almastyrý operasııasyn jasady, dep habarlaıdy Habar 24 telearnasy.
Buǵan medısına salasyna engizilgen zamanaýı tehnologııa jáne sheteldik ǵalymdarmen tyǵyz jumys isteýdiń arqasynda qol jetip otyr. Mundaı hırýrgııalyq emdik sharalary sozylmaly júrek jetispeýshiligi kezinde asa qajet. Búginde elimizde júrekke donor tapshy.
Mamandardyń aıtýynsha, dál osy operasııalar naýqasqa donor tabylǵanǵa deıin ómir súrýine múmkindik beredi. Qazir osy taqyrypta qalada halyqaralyq konferensııa ótip jatyr. Oǵan elimizben qatar Japonııa, Túrkııa, Úndistan, Pákistan memleketteriniń úzdik degen kardıolog mamandary qatysýda.
Aıta ketý kerek, búginde óńirde 250-ge jýyq adam kardıoesepte tur.
«Jasandy júrek jumys istep turǵan 3-5 jyldyń ishinde donor tabylyp qalsa adamnyń júregine almastyrýǵa bolady. Bul adamdar kádimgideı júrip, dalaǵa shyǵyp, jeńil jumystardy atqarýyna múmkindik beredi. Tipti mashına, motosıkl júrgizip júrgenderi de bar. Bul úlken jetistik dep oılaımyz. Áli de aldyǵa qoıǵan maqsat, isteıtin ister kóp», - deıdi Ǵylymı-klınıkalyq kardıohırýrgııa jáne transplantologııa ortalyǵynyń dırektory Seıithan Joshybaev.