«Qazaqstannyń ekonomıka ǵylymy: izdenister men sheshimder» taqyrybynda QR Bilim jáne ǵylymı mınıstrligi Ǵylym komıtetiniń Ekonomıka ınstıtýtynda ótken halyqaralyq ǵylymı-tájirıbelik konferensııa akademık Túımebaı Áshimbaevtyń týǵanyna 100 jyl tolýyna arnaldy. Ǵalymnyń eńbekteri jaıyndaǵy keń aýqymdy konferensııany uıymdastyrýǵa Ekonomıka ınstıtýty mamandarymen qatar «Turan», Narhoz Ýnıversıteti, Qazaqstan ekonomıka ǵylymdar akademııasy, QR Prezıdentiniń muraǵaty, QR JOO qaýymdastyǵy, «Turan-Astana» ýnıversıteti ótkizdi.
Ekinshi Dúnıejúzilik soǵys jyldarynan keıin eńbek jolyn qatardaǵy ekonomıst bolyp bastaǵan akademık Túımebaı Áshimbaevtyń elimizdiń ǵylymyna qosqan súbeli úlesi zor. 1958 jyly eńbegin QazSSR Ekonomıka ınstıtýtynda kishi ǵylymı qyzmetkerden bastaǵan ǵalym 1963 jyly ınstıtýttyń ǵylymı hatshysy, 1965 jyly – bólim meńgerýshisi, al 1967-1973 jyldary dırektordyń orynbasary dárejesine deıin kóterildi. 1973 jyly Ekonomıka ınstıtýtynyń dırektory bolyp taǵaıyndaldy. 1988 jylǵa deıin 15 jyl osy mindetti qaltqysyz atqarǵan ǵalym 1970 jyly Qazaq KSR Ǵylym Akademııasynyń korrespondent múshesi bolyp saılandy.
Konferensııanyń alǵysózin bastaǵan QR BǴM ǴK Ekonomıka ınstıtýtynyń dırektory, e.ǵ.d, professor, QR UǴA akademıgi A.A. Satybaldın akademık T.Áshimbaevtyń osy ınstıtýt qabyrǵasyndaǵy ilgerindi eńbekterin atap ótti. Al konferensııany quttyqtaý sózimen bastaǵan QR Bilim jáne ǵylym mınıstrligi Ǵylym komıteti tóraǵasynyń orynbasary E.T. Sadyqov T.Á.Áshimbaevtyń tyńnan jol salyp, áleýmettik-ekonomıkalyq problemalardy zertteýdegi eńbekteri baǵa jetpes qundylyǵymen erekshelenetindigin atap ótti.
Ǵylym jolynda T.Áshimbaev 400-den astam ǵylymı eńbek, sonyń ishinde 19 irgeli monografııa jarııalady, 40-qa jýyq ǵylymı jumys tikeleı ǵalymnyń redaksııalyǵymen jaryq kórgen. T.Á.Áshimbaevtyń ǵylymı kadr daıarlaýda óz mektebi qalyptasyp, onǵa jýyq ǵylym doktory men 50-den astam ǵylym kandıdat tárbıelep shyǵardy. Búginde ǵalymnyń shákirtteri ekonomıkanyń túrli salalary men memlekettik qurylymdarda eńbek etýde.
Konferensııa barysynda T.Áshimbaevtyń qyzy Natalıa Áshimbaeva ákesiniń ómirine qatysty mańyzdy sátterdi eske ala otyryp, ǵylymdaǵy eńbeginiń barysyna toqtalyp ótti. Al QR UǴA akademıgi A.Q. Qoshanov, QR UIA akademıgi, e.ǵ.d., professor, C.O.Sábden, QR UǴA akademıgi, e.ǵ.d., professor, O.B. Baımuratov, QR JOO Qaýymdastyǵynyń prezıdenti R.A. Alshanov, e.ǵ.d., professor S.A. Svıatov, M.V. Lomonosov atyndaǵy MMÝ Qazaqstan fılıalynyń dırektory, e.ǵ.d, professor A.V. Sıdorovıch, Tashkent memlekettik ekonomıkalyq ýnıversıtettiń professory, e.ǵ.d. A.F. Rasýlev, e.ǵ.d., professor Ý.J. Alıev jáne t.b. baıandama jasap, akademık T.Áshimbaevtyń ómirdegi jáne ǵylymdaǵy jarqyn joldary týraly sátterdi eske aldy.
Konferensııa jumysyna qatysqan ózge de otandyq jáne sheteldik ǵalymdar, bıznes jáne halyqaralyq uıymdary ókilderi EAEO elderiniń ekonomıkalyq damý teorııasy turǵysynda jalpyálemdik úrdister men ulttyq erekshelikter; óndiristik qorlardyń tıimdiligin arttyrý jáne Qazaqstan ónerkásibindegi eńbek ónimdiligin ósirý problemalary; Qazaqstannyń áleýmettik saıasatynyń basymdyqtary jáne eldiń ómir súrý sapasynyń jańa standarttary; ulttyq ekonomıkany sıfrlandyrý; «Jasyl ekonomıka» Qazaqstannyń turaqty damý baǵyty retinde; qazaqstandyq qoǵamnyń rýhanı jańǵyrýy sııaqty taqyryptar tóńiregindegi máselelerdi talqylap, pikirlerin ortaǵa saldy.
Elvıra Serikqyzy,
«Egemen Qazaqstan»
ALMATY