Renat Elýbaevtyń sýretpen kásibı túrde aınalysqanyna nebári jeti jyldyń kólemi bolypty. Biraq boıdaǵy týabitti talanty shyqpaı qoımaıdy eken. Osy ýaqyt aralyǵynda birneshe halyqaralyq báıfgelerge qatysyp, jeńimpaz atanǵan. Birer kún buryn Astanadaǵy Qazaqstan Respýblıkasynyń Tuńǵysh Prezıdenti – Elbasy kitaphanasynda «Máńgilik eles» atty kezekti kórmesin ótkizdi.
О́mirdiń túrli qıyndyǵyna ushyraǵannan keıin ol janynyń tynyshtyǵyn izdep, qylqalamdy serik etken Beıneleý ónerine bet burýyna asyl jary sebepshi bolypty. Sodan bolsa kerek, kórmege tek jan dúnıesi beınelengen, ımpressıonızm baǵytyndaǵy 40 kartınasyn qoıǵan.
Olardyń basym bóligi osy jyly ǵana salynypty. Shyǵarmalaryna kóz júgirtsek, ótken kúnge, sábı shaǵyna, týǵan jerine degen saǵynysh lebi esip turady. Sary tústi boıaýdy kóbirek qoldanǵanynyń da syry osynda sııaqty. Keıbir týyndylarynda taý shatqaldaryn ásireleı, ásemdegen tustary da bar. Ádemiligi óz aldyna, avtor osy arqyly ómirdiń túrli qıyndyqtaryn jetkizgisi kelgendeı. Kartınalarynyń ıdeıalyq astarynan ótken zaman men búgingi kúnniń sabaqtasyp jatqany baıqalady.
– Kórmeni «Máńgi eles» dep ataýymnyń sebebi – eles eshqashan bitpeıdi, ol máńgi, sheti-shegi men ushy-qıyry joq, – dep Renat qysqa ǵana qaıyrdy.
Shyn talant, onyń qylqalamynan týǵan dúnıeler ýaqyt óte kele jarqyraı bermek. Talantynyń taǵy bir erekshe tusy – kórmege qoıylǵan týyndylarynyń kóbin «kózsiz» otyryp salypty.
– Kózimdi jumyp otyryp sýret salǵanda artyq eshnárse oılamaımyn. Kóz aldyma elestegen dúnıeni ádemi áserge berile otyryp, shabyttana salamyn. Sonda qııalymdaǵy beıne qaǵaz betine anyǵyraq túsedi. Árıne, negizgi bóligin salyp bolyp, árleıtin jerine kelgende qarap otyryp salamyn. Kózimdi jumyp salǵan kezde ishki jan-dúnıem, sezimim sózben aıtyp jetkizgisiz, erekshe kúıge bólenedi, – deıdi ol bizge shyǵarmashylyq qupııasyn ashyp.
Onyń aıtýynsha, kózsiz sýret salý ádisin álemdik tájirıbede on jasqa deıingi balalar ǵana qoldanylady eken. Sebebi osy jasqa deıingi órenderdiń jan-dúnıesi, túısigi, kózqarasy kirshiksiz taza bolady. Al odan ary qaraı bul sezim báseńdeıtin kórinedi.
Al Renattyń jasy otyzdan assa da osy ádispen salýy sýret álemine kesh kelýinen bolsa kerek. Ol nebári jeti jyldyń ishinde kez kelgenniń qolynan kele bermeıtin jetistikterge jetti. Búginge deıin Belarýs, Reseı elderinde jeke kórmelerin ótkizdi. AQSh, Italııa, Armenııa memleketterindegi baıqaýlarǵa qatysyp, jeńimpazdar qatarynan kóringen.
Aıan ÁBDÝÁLI, «Egemen Qazaqstan»