Qyzyljar aýdanynda ornalasqan «Qulager» ıppodromynda jazǵy at jarysy maýsymy ashylyp, jelmen jarysqan, aýyzdyǵymen alysqan 60 sáıgúliktiń shabysy báıge dese ishken asyn jerge qoıatyn jankúıerlerdiń delebesin qozdyrdy.
Sporttyq sharanyń ashýly saltanatynda sóılegen sózinde oblys ákiminiń birinshi orynbasary Aıdarbek Saparov jınalǵan qaýymdy dúbirli saıystyń bastalýymen quttyqtap, sportty serik etýge, salamatty ómir súrýge shaqyrdy. Ulttyq sport túrleri boıynsha «Tulpar», «Qyzyljar arlandary» sport klýbtarynyń jumys isteıtinin atap ótti.
Jurtshylyq qysqa qashyqtyqtaǵy maıda jorǵa, qunan, ushqyr, top jáne alaman báıgelerdi qyzyǵa tamashalady. Qunan báıgede Qyzyljar aýdanynyń «Adate» esimdi júırigi sórege birinshi bolyp keldi. Jorǵa jarysta da qyzyljarlyqtardyń mereıi ústem boldy.
Jarystyń kórigin alaman báıge qyzdyrdy. Ǵ. Músirepov aýdanynyń namysyn qorǵaǵan Mansur Jastelenov «Vasılek» tulparymen aldyna qara salmady.
О́mir ESQALI, «Egemen Qazaqstan»