Búgin Astanada 71 Kann kınofestıvalinde «Úzdik áıel róli» nomınasııasynyń jeńimpazy atanǵan Samal Eslıamovanyń qatysýymen baspasóz konferensııasy ótti. Jıynǵa mádenıet jáne sport mınıstri Arystanbek Muhamedıuly, rejısser Sergeı Dvorsevoı qatysty.
Ulttyq kıno ónerimizdiń damý tarıhyndaǵy erekshe jetistik ekenin ataǵan mınıstr Arystanbek Muhamedıuly aktrısa Samal Eslıamovany «Úzdik áıel róli» nomınasııasynyń jeńimpazy atanýymen quttyqtady.
«Bul ulttyq kıno ónerimizden bólek, álemdik ónerdiń úlken jetistigi. Osy oraıda talantty rejısser Sergeı Dvorsevoıǵa, aktrısa Samal Eslıamovaǵa alǵys bildiremin. Keremetteı tandem bolǵan shyǵarmashylyq ujym 10 jyldan beri yntymaqta jumys istep keledi. Keńes Odaǵy kezinde post keńestik elder arasynda mundaı marapat buryn-sońdy bolǵan emes», degen Arystanbek Muhamedıuly Samal Eslıamova men rejısser Sergeı Dvorsevoıǵa arnaıy syı-sııapat tartý etti.
«Birneshe kúnnen beri qanshama quttyqtaýlar kelip túsip jatyr. Týǵan elińniń yqylasyn seziný – naǵyz baqyt. Týyp-ósken el-jurtyma zor rızashylyǵymdy bildiremin», dedi aktrısa Samal Eslıamova.
Samal Eslıamova Soltústik Qazaqstan óńirinde, qarapaıym otbasynda dúnıege kelgenin aıtady. «Ákem ormanshy, anam pochtada jumys istedi. Kezinde anam meni orys mektebine bermek bolǵanda, alty jasymda qazaq mektebine baramyn dep tabandap turyp aldym. Osylaısha qazaq mektebinde bilim aldym», dep ótkendi eske aldy aktrısa.
Mektep bitirgen soń Petropavldaǵy óner kolledjinde akter mamandyǵy boıynsha bilim alǵan Samal Eslıamova, 2011 jyly Reseıdiń teatr óneri ýnıversıtetinde (GITIS) oqýyn jalǵastyrǵan.
Rejısserdiń sózinshe, «Aıka» fılmi alty jyl boıy túsirilgen. Fılm bıýdjeti 2,5 mln eýroǵa jete qabyl.
Buǵan deıin Samal Eslıamova «Qyzǵaldaq» (rej. S. Dvorsevoı) fılminde basty róldi somdaǵan. Bul týyndy 2008 jyly Kannda «Erekshe kózqaras» konkýrsynyń bas júldesin, jas ádilqazylardyń júldesin, Fransııanyń bilim mınıstrliginiń júldesin jeńip alǵan bolatyn.
Aıa О́MIRTAI,
Sýretti túsirgen Erlan OMAROV,
«Egemen Qazaqstan»