Mańǵystaý oblystyq sotynda sýdıalar men sot qyzmetkerleriniń qatysýymen «Sot júıesin jetildirýdiń 7 baǵyty» boıynsha dóńgelek ústel ótkizilip, jumys tobynyń baǵyttary men mindetteri talqylandy.
Osyǵan deıin 13 sáýirde tóraǵa ókimimen oblystyq sotta 7 baǵyt boıynsha arnaıy jumys toby qurylyp, jaýapty sýdıalar men qyzmetkerler bekitilgen bolatyn. Dóńgelek ústel barysynda jumys tobynyń ókilderi sot júıesin odan ári damytý, sot tóreligine senimdi arttyryp, sot tóreliginiń ádildigin, jaýapkershiligin arttyrý máselelerin ortaǵa saldy.
Mańǵystaý oblystyq sot tóraǵasy J.Alanov minsiz sýdıanyń kelbeti men oǵan qoıylatyn basty talaptarǵa erekshe toqtalyp, táýelsiz sot tóreliginiń halyqaralyq standarttary negizinde qazaqstandyq qoǵamnyń suranysyna saı, joǵary kásibı sot korpýsyn qalyptastyrý, sot tóreligin atqarý kezindegi sýdıalardyń syrtqy jáne ishki táýelsizdigin zańnamalyq, quqyqtyq jáne materıaldyq kepildikterin arttyrý týraly atap ótti. Sondaı-aq, ol sýdıanyń konkýrsqa qatysý kezinde qoıylatyn talaptaryn bekitip, minsiz sýdıa sybaılas jemqorlyqtan ada bolý kerektigi týraly usynys engizý qajettigine toqtaldy.
Odan ári sot tóraǵasy jaqynda Batys aımaǵy boıynsha sot tóraǵalarymen kezdesý ótkizip, 7 túıinde kózdelgen bastamalar men jumys baǵyttaryn talqylaýdy, ózara pikir almasýdy, oblystyq sotta ashylatyn medıasııa ortalyǵyn qazaqy naqyshta bezendirý týraly oıymen bólisti.
Is-sharaǵa qatysýshylar tatýlastyrý jobasy boıynsha kámeletke tolmaǵandardyń isteri jónindegi mamandandyrylǵan aýdanaralyq sotynda, Aqtaý qalasy №2 sotynda medıasııamen qaralatyn isterdiń sanyn arttyrý, sýdıalardy medıasııany júrgizý boıynsha tereńdetilgen kýrstarǵa óz erkimen jiberý, sýdıalar atyna túsken alǵys hattar boıynsha minsiz sýdıa jobasyna usynys engizý, 7 túıin jobasy boıynsha sot ardagerlerin, medıatorlardy, advokattardy jumysqa tartý týraly oılaryn belsendi túrde ortaǵa saldy.
Mańǵystaý oblystyq sot sýdıasy A.Molbaeva oblystyq sotta daýlar men janjaldardy retteý boıynsha halyqqa keshendi qyzmet kórsetý, tatýlasý rásimderiniń qoldaný aıasyn keńeıtý maqsatynda medıator, advokat, notarıýs, HQO jáne kásipodaq ortalyǵy ókilderinyń keńesterin alýǵa múmkindik beretin «Quqyqtyq qyzmet kórsetý ortalyǵyn» ashý týraly usynys aıtty. Sonymen qatar, sottar ákimshisiniń basshysy H.Begalıev «7 túıin» jobasy aıasyndaǵy jumys tobynyń fýnksıonaldyq mindetteri boıynsha óz usynystaryn bildirdi.
Qyzý talqylaý sońynda sýdıa-medıatordy basqa jumystardan bosatý týraly ókim shyǵarylyp, onyń mindetteri, jaýapkershiligi men jumys tártipteri aıqyndaldy. Jumys tobyndaǵy sýdıalar men sottar ákimshisiniń qyzmetkerlerine bir apta merzim ishinde jumys baǵyttaryn naqtylap, jospar bekitip, birqatar naqty tapsyrmalardy júzege asyrý júkteldi.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy