О́tken ýıkendte Chempıondar lıgasynyń fınaldyq oıyny ótti. Qart qurlyqtyń basty dodasynda Ispanııanyń «Realy» Anglııanyń «Lıverpýlin» 3:1 esebimen utqan bolatyn. Osy jeńisi arqyly Madrıdtiń komandasy úshinshi jyl qatarynan Chempıondar lıgasynyń jeńimpazy atanyp, tarıhty jańartty. Zınedın Zıdan bastaǵan ujymnyń osy týrnırdegi jetistiginiń syry nede? Al osyǵan deıin alpaýyt komandalarǵa ses kórsetip kelgen «Lıverpýldiń» jeńilisine ne sebep boldy?
Bek TО́LEÝOV, jýrnalıst: «Fınalda favorıt bolmaıdy degen túsinik bar. Biraq «Realdyń» oıynshylary tájirıbeli, naǵyz tisqaqqandar. Sondyqtan olar qandaı kezde bolmasyn jınalyp, qajetti nátıjege jetý úshin aıanyp qalmaıdy. Fınalǵa deıin PSJ, «Iýventýs», «Bavarııa» sekildi myqtylardyń barlyǵyn kezdesip, eki oıynnyń qorytyndysy boıynsha jeńiske jetip otyrdy. Al «Lıverpýldiń» fýtbolshylary Mohammed Salah jaraqat alyp, alańnan ketken kezde abdyrap qaldy. Osyndaı tusta tájirıbeniń azdyǵy baıqalady.
Zınedın Zıdan olımpıadalyq júıe boıynsha ótkiziletin kýboktarda komandasyn jigerlendire alatyn bapker ekenin taǵy bir márte dáleldedi. 38 týrǵa sozylatyn chempıonatqa qaraǵanda, Zıdanǵa kýboktyq oıyndar yńǵaıly sekildi. Osymen úshinshi jyl qatarynan Chempıondar lıgasyn jeńip alýy osynyń dáleli bolsa kerek.
Fınalda eki birdeı óreskel qatelik jibergen «Lıverpýl» qaqpashysy Lorıs Karıýsti kinálap jatqandar kóp. Biraq, Karıýsti emes, oǵan senim bildirip júrgen bapkerler shtabynyń qateligi dep aıtýǵa bolar. Germanııalyq qaqpashy buǵan deıin de basqa matchta jıi qatelesip júrgen bolatyn. Al fınalda ol tipti qobaljyǵanyn basa alǵan joq. Sondyqtan ázirge ol mundaı oıyndarda óner kórsetýge daıyn emes.
Bul fınal birazǵa deıin umtylmas. «Salahtyń jaraqaty», «Karıýstyń qateligi», «Beıldiń benefısi» bolǵan fınal dep birazǵa deıin eske alatyn shyǵarmyz.
Bir qýantqany, fınalda jumys istegen tóreshiler brıgadasy eshqandaı óreskel qatelik jibergen joq. Barlyǵy ádil boldy. Tek Mohammed Salahtyń jaraqaty jankúıerlerdiń únjyrǵasyn túsirgenin aıtpasaq, Kıevtegi fınal kóńilden shyqty».
Ázız JUMADIL, jýrnalıst: «Oıynnyń ótkenine úsh kúnge jýyqtap qaldy, biraq «Real» men «Lıverpýl» tóńiregindegi áńgime áli tynshymaı tur. Madrıdtikterdiń myqtylyǵyn moıyndaıtyndar da kóp, jeńisin dattaıtyndar da jeterlik. Biz de ózimizdiń «bes tıynymyzdy» qosaıyq.
«Realdyń» qansha jankúıeri bolsa, sonsha heıteri bar. Uly klýbtardyń barlyǵynda solaı. Sondyqtan, matchtaǵy keıbir jaǵdaılar jaıly ártúrli áńgimelerdiń bolýy zańdylyq. Degenmen, Mohammed Salahty syndyrdy dep Serhıo Ramosty aıyptaǵandar nelikten Lorıs Karıýs jaıly jaq ashpaıtynyna tańym bar. Shyntýaıtynyna kelgende «Lıverpýldiń» jeńilisine qaqpashyny da kinálaı berýge bolmaıdy. Ár adamnyń sátsiz kúni bolady. Bálkim, 26 mamyr nemis kıperiniń de tósekten sol aıaqpen turǵan kúni bolǵan shyǵar. Al «Salah alańda bolǵanda «Real» «Lıverpýldi» jeńe almas edi» degenmen kelisý qıyn. Mysyrlyq shabýylshy 10-shy mınýtta emes, 30-shy mınýtta jaraqat alyp, alańnan ketti. Qarsy komandanyń qorǵaýshylaryn ózine qaratýmen boldy demeseńiz, Mohammed jarty saǵatta jarytyp eshnárse de jasaı alǵan joq. Onyń qasynda oıynǵa 61-shi mınýtta qosylǵan Garet Beıl 25 mınýtta eki gol soǵyp, fınaldyń taǵdyryn sheship tastady. Ras, Salah komandalastaryna senim beretin oıynshylardyń qatarynan. Ol alańnan ketken soń buǵan deıin táp-táýir oınap júrgen Djeıms Mılner men Djordan Hendersonnyń da doby túzý ushpaı qoıdy. Roberto Fırmıno da qur júgire berdi. Áıtse de, ádette madrıdtikter birinshi taımda qorǵanysqa kóbirek kóńil bólip, qysymdy úzilisten keıin arttyratyn komanda. Chempıondar lıgasyndaǵy bıylǵy oıyndary solaı deıdi. Sondyqtan, «Realdyń» jeńisine Salahtyń jaraqaty sebepker emes.
Álbette, Mohammed Salahtyń jaraqat alyp qalǵany ókinishti. Mundaı oıynshylardyń fınaldy bastan-aıaq oınaǵany tarıh úshin tıimdi. Endi onyń álem chempıonatyna deıin aıyǵyp ketkenin tileımiz. Sondaı-aq, «Real» sapynda saptan shyǵyp qalǵan Danıel Karvahaldiń de erterek qatarǵa qosylǵanyn qalaımyz.
Al esep, siz ben biz qalaı desek te – 3:1. Birneshe jyldan keıin jankúıerlerdiń esinde osy ǵana qalady. Qalǵandarynyń barlyǵy ýaqytsha nárse. Eshkim de Karıýstyń qatelikterin, Karvahal men Salahtyń jaraqattaryn eske almaıdy. «Realdyń» qatarynan úsh ret jeńimpaz bolǵany ǵana aıtyp júredi».