Rýdnyıda jastarǵa jańa demalys orny ashyldy. Qala ortalyǵynan Eýrazııalyq Top (ERG) quramyndaǵy Sokolov-Sarybaı ken-baıytý óndiristik birlestiginiń (SSKО́B) qoldaýymen jańa, kólemi aýqymdy skeıt saıabaǵy jasaldy.
«Gornıak» qonaq úı kesheniniń aýmaǵynda oryn tepken jańa pamp-trek pen skeıt saıabaǵynyń jalpy kólemi 800 sharshy metr bolady. Munda barlyq qala turǵyndary qalaýy boıynsha BMX markaly velosıpedi men skeıt tebe alady. Jańa demalys ornyn SSKО́B-tiń qoldaýymen almatylyq «SporttechKazakhstan» shyǵarýshy-kompanııasy ornatty.
«Birneshe alańshadan turatyn mundaı úlken jobamen biz birinshi ret jumys jasap otyrmyz. Buryn bir ǵana sport túrine arnalǵan jeke-jeke skeıt saıabaqshalaryn Almaty men Petropavl qalalaryna ornatqan edik. Atalǵan joba qoldanystaǵy normalar men talaptarǵa sáıkes ázirlendi» dedi kompanııa menedjeri Maǵjan Qaıratuly.
Pamp-trek pen skeıt saıabaǵyn ornatý bastamasyn SSKО́B prezıdenti Bereke Muhametqalıev kóterdi. О́ıtkeni jastarmen kezdesý barysynda birlestik basshysyna zamanaýı skeıt saıabaǵyn salyp berý týraly ótinish túsken bolatyn. Bereke Muhametqalıev kómektesýge ýáde bergen-di. Jobany júzege asyrýǵa kásiporyn 30 mln teńge qarjy bóldi.
«Biz Rýdnyı qalasyn tartymdy jáne zaman talabyna saı damyta berýimiz kerek. Skeıt saıabaǵy – bizdiń jastarǵa qajet ýaqyttyń brendi. Biz olardy árdaıym qoldaımyz jáne salaýatty, jan-jaqty damyǵan, qýatty, oı-órisi keń jastarǵa erekshe senim artamyz. Dál osyndaı mamandar SSKО́B pen ERG-diń bolashaǵyn qalyptastyrady» dedi SSKО́B prezıdenti Bereke Muhametqalıev.
Názıra JÁRIMBET, «Egemen Qazaqstan»