Elbasy jaqynda Almaty oblysyna jasaǵan jumys sapary barysynda Alakólde bolyp, elimizdiń týrıstik áleýetin arttyrýǵa qatysty arnaıy jıyn ótkizgen edi. Sol jıynda Memleket basshysy: «Alakól – Qazaqstannyń týrısteri kóptep keletin jer bolýy kerek. Bul – shıpaly kól. Sýynyń emdik qasıeti bar. О́te qajetti jer. Qazaqstandyqtar osy jerge kelip demalýy kerek», degen edi.
Prezıdenttiń bul sózi Alakóldiń shyǵystaǵy, ıaǵnı Úrjar aýdany aýmaǵyndaǵy bóligine de qarata aıtylǵany anyq. Jasyratyny joq, kól sýy qansha jerden shıpaly bolsa da, oǵan baratyn jol oıqy-shoıqy, jatar oryn jaısyz, qyzmet kórsetý sapasyz bolsa týrısterdiń teris aınalatyny aıtpasa da túsinikti. Qazir «qaıda barady deısiń? Kelse de keledi, kelmese de kelediniń» zamany ótken. Búginginiń týrısine eń áýeli keregi – sapaly qyzmet. Muny nege aıtyp otyrmyz? Osydan biraz jyl buryn Alakóldiń Shyǵys Qazaqstandaǵy aýmaǵynda ınfraqurylym men qyzmet kórsetý sapasy nashar bolǵanyn eshkim joqqa shyǵara qoımas. Qalaı bolsa solaı salynǵan qurylystar men alqam-salqam jaıma bazarlar kelýshilerdi shoshytpasa da kóńilderin sý sepkendeı basatyn edi.
Dál qazirgi tańda «Alakól adam tanymastaı keıipke endi, Antalııaǵa aınaldy» dep bórkimizdi aspanǵa atpasaq ta, birshama ózgerip, demalys oryndary tártipke keltirilip, jańa nysandar boı kótergeni belgili. Byltyr kól jaǵalaýyn retke keltirý men demalys ornyna aparatyn joldardy jóndeý maqsatynda oblystyq bıýdjetten 2 mıllıard teńgege jýyq qarajat bólinip, avtoturaqtar salynyp, feldsherlik pýnkt, jańa saıabaq pen avtovokzal ashylǵan-dy.
Oblys ákimi Danıal Ahmetov 2017 jyly Úrjar aýdanyna barǵan saparynda 2018 jyly týrısterge budan da jaıly jaǵdaı jasalatynyn, shomylý maýsymyna deıin «О́skemen-Shar-Jalańashkól» baǵytyndaǵy temir jol qatynasy paıda bolatynyn, Jalańashkól stansasynan Alakólge deıingi avtomobıl joly kúrdeli jóndeýden ótetinin, Astana-Úrjar, Almaty-Úrjar baǵyttaryndaǵy áýe reısteri toqtaýsyz júrýi kerektigin aıtqan edi.
Jaqynda aımaq basshysy Alakólge arnaıy baryp, sýǵa shomylýdyń jańa maýsymyna daıyndyq barysyn pysyqtap qaıtty. Bir jyldyń muǵdarynda munda jańa oryndyqtar men gúlzarlar qoıylyp, jerge trotýarlyq plıtalar tóselipti. Ortalyqta shyǵarmashylyq keshter, sahnalyq qoıylymdar men bı keshterin ótkizýge arnalǵan úsh ólshemdi shatyr konstrýksııalary ornatylypty. Qazirgi ýaqytta Alakólde jaıaý júrginshiler aımaǵynda tamaqtaný oryndary, balalarǵa arnalǵan oıyn jáne sport alańdary jabdyqtalyp, qoljetimdi taza aýyz sý men dárethana modýlderi qurylyp, kóshe boıyna aǵashtar men gúlder otyrǵyzylyp, Arbattyń ortalyq bóliginde sýburqaq qurylysy júrgizilip jatyr.
О́skemen men Semeıden poıyz júrediOblys ákiminiń sapary barysynda bıylǵy sýǵa shomylý maýsymynda Alakólge (Jalańashkól st.) О́skemen men Semeıden poıyz qatynaıtyny, Maqanshy men Jalańashkól baǵytyndaǵy jolǵa orta jóndeý jumystary qolǵa alynyp jatqany, Qarabulaq pen Qabanbaı aýyldary arasyndaǵy 16 shaqyrym jol da jaqyn ýaqytta jóndeletini aıtyldy. Poıyz demekshi, О́skemen men Semeıden demalys ornyna deıin júretin otarbanyń baǵasy da demalýshylardyń qaltasyn qaqpaıtyndaı eken. Bılet quny – 2800 teńge. Aımaq basshysy kelesi jyly Alakól jaǵasyna bekemdeý jumystary júrgiziletinin, bul maqsatqa oblystyq bıýdjetten 5 mıllıard teńgege jýyq qarjy bólý josparlanyp otyrǵanyn, sonymen qatar kól jaǵalaýyna tegin wi-fi ornatylatynyn jetkizdi.
Byltyr D.Ahmetov Alakóldiń irgesindegi Qabanbaı aýylyndaǵy kóp jyldar boıy qańyrap bos turǵan Mádenıet úıin týrısterge qyzmet kórsetetin mýzeıge aınaldyrý kerektigin aıtyp, tıisti mekemelerge tapsyrma bergen-di. Búginde atalmysh nysanǵa jóndeý bastalyp, qundy jádigerlermen tolyqtyrý jumystary júrgizilip jatyr. Arnaıy qurylǵan aqparattyq ortalyqta tek qundy jádigerler ǵana emes, Alakóldegi barlyq saýyqtyrý bazalary men sýdyń emdik qasıetteri týraly málimetter de jınaqtalýda. «Alakól – xalqymyzdyń baılyǵy. Ol xalyqaralyq standartqa saı bolýy tıis. Deńgeıin kóterý úshin jumyla áreket etemiz. Budan bylaı joǵary deńgeıdegi, jaıly ári sándi qonaq úıler salatyn kásipkerlerdi ǵana tartamyz. Bizdiń maqsatymyz – qazaqstandyq týrısterdi ǵana emes, sheteldikterdi de osy biregeı aımaqqa ákelý. Olar oblystyń búkil sulýlyǵyn jáne qazaq halqynyń qonaqjaılylyǵyn kórýi kerek», – deıdi aımaq basshysy.
Azamat QASYM,
«Egemen Qazaqstan»
Shyǵys Qazaqstan oblysy, Úrjar aýdany
Sýretterdi túsirgen
Tileýbek ShAIаHMET