Elordanyń 20 jyldyǵyna oraılastyrylǵan biregeı joba Astananyń mádenı kúnderi Mańǵystaý oblysynda boldy. Elordalyq artıster Aqtaý qalasynyń alańdarynda keremet konsertter uıymdastyryp, ózderiniń úzdik teatrlandyrylǵan qoıylymdaryn qoıdy, sondaı-aq kelýshiler nazaryna otandyq sýretshilerdiń eńbekteri de usynyldy.
Úsh kún boıy Jantórın atyndaǵy Mańǵystaý oblystyq mýzykalyq drama teatrynda «Aq tilekpen, Astana!» kórmesi jumys istedi. Eske salaıyq, ekspozısııaǵa 50 qazaqstandyq sýretshiniń 100-ge tarta eńbegi shyǵaryldy.
Sonymen qatar, «Jastar» teatrynyń artısteri aqtaýlyqtarǵa úzdik qoıylymdar usyndy. Olardyń qatarynda qoıýshy-rejısser Qazaqstannyń eńbek sińirgen qaıratkeri Nurqanat Jaqypbaıdyń «Qyz Jibek» mıýzıkli jáne «Janarymdaǵy jalǵyz áýen» («Zrımaıa pesnıa») qoıylymy, sondaı-aq Ýılıam Shekspırdiń «Asaýǵa tusaý» («Ýkroshenıe stroptıvoı») komedııasy bar.
Mádenı baǵdarlama aıasynda «Astanadan aq tilek» gala-konserti ótip, aqtaýlyqtar Astana qalasy ákimdigi Memlekettik akademııalyq fılarmonııasy ujymdarynyń shyǵarmashylyǵymen tanysady. Atap aıtqanda, QR eńbek sińirgen qaıratkeri Aıtqalı Jaıymov jetekshilik etetin Qazaq orkestri, estradalyq bı, «Shalqyma» halyq bıi ansamblderi, estradalyq, klassıkalyq jáne halyq vokaly solıstteri óz ónerlerin ortaǵa saldy. Sonymen qatar, Klara Tólenbaeva, «Art-Dombyra» trıosy, Rınat Malsagov, Kúláıym Qaıyrbaeva, Aıgúl Qosanova, Almas Kishkenbaev, Tamara Asar syndy qazaq estradasynyń tanymal artısteri Astanadan jalyndy mýzykalyq sálem jetkizdi.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy