Oblys ortalyǵyndaǵy saıası qýǵyn-súrgin qurbandaryn eske alý eskertkishi aldynda ótkizilgen qaraly mıtıngide kelmeske ketken zulmat kezeńge baılanysty nebir «aqtańdaqtar» jaıly syr shertildi.
Aımaq basshysynyń birinshi orynbasary Aıdarbek Saparov óz sózinde urdajyq saıasat pen qoldan jasalǵan asharshylyqtyń saldarynan teriseıde de myńdaǵan arystar men aptal azamattar aıaýsyz qorlyq, beınet kórgenin, tek Táýelsizdik alǵannan keıin ǵana ashy shyndyq aıtyla bastaǵanyn jetkizdi.
Bul oraıda oblystyń qurmetti azamaty, qadirmendi aqsaqal Bolat Saǵyndyqov jetekshilik etetin «Pamıat» qoǵamdyq qory birtalaı ister tyndyrǵanyn ataı ketken jón. Qýǵyn-súrgin qurbandarynyń qurmetine memorıaldyq keshen ornatylyp, 7600-den astam jerlesimizdiń esimderi tasqa qashap jazylǵan. 8 myńǵa jýyq adam esh jazyqsyz jazalansa, 1650-i atý jazasyna kesilgen.
–Jýyrda qaraly tizim taǵy da 8 adamǵa tolyqty. Naqty derekti anyqtaý múmkin emes. Zulmatty jyldar qasyretin búgingi urpaq sezinip ósetindeı jumystar júıeli júrgizilýi tıis», deıdi uıym tóraǵasy.
Qoǵamdyq qordyń qýǵyn-súrgin qurbandary jaıly jan-jaqty maǵlumattar ornalasqan murajaı ashý týraly usynysy oblystyq ákimdik tarapynan qoldaý taýyp otyr. Sol sııaqty memorıaldyq keshendi óńirimizdiń kıeli oryndar qataryna engizý mindeti tur. Munymen qosa aýyldyq jerlerde eskertkishter ornatý sharalary jalǵasyn tabatyn bolady. Mamlıýt aýdany Bostandyq aýylynda arnaıy eskertkish turǵyzyldy.
О́mir ESQALI,
«Egemen Qazaqstan».
Soltústik Qazaqstan oblysy.