Astanada «Qoldaıyq, aýyl mektebin!» aksııasy ótti

«Qoldaıyq, aýyl mekte­bin!» aksııasy aıasynda aýyl mek­tepterine Almaty qalasyndaǵy fızıka-ma­tematıka baǵytyndaǵy Nazarbaev zııat­kerlik mektebi qurastyrǵan 3D prınterleri syıǵa berildi. Me­rekelik kerýen shalǵaıdaǵy bilim oshaqtaryna 6 myńǵa jýyq kitap, 3 myńǵa tarta bólme gúlde­ri jáne sporttyq oıyndarǵa arnalǵan quraldardy da syılady. Ártúrli ádebıetterdi zııatkerlik mekteptiń oqýshylary men ustaz­dary oqý ornynda dástúrge aınal­ǵan «Bookrossing» aksııasy bo­ıynsha jınaǵan bolatyn. Al synyptarǵa erekshe sán bergen ósimdikterdi zııatker­lik mekteptiń oqýshylary mekteptiń jylyjaılarynda ósirdi. Sondaı-aq mektepterdiń dáliz­derine «Oqý. Izdený. Talap­taný», jańartylǵan bilim berý mazmuny aıasyndaǵy ádistemelik taqtalar ilindi. Aýyl balalaryn ásirese «100 kitap» joba­sy, «Bolashaqqa baǵdar: rýhanı jań­ǵyrý» maqalasyna negiz­del­gen is-sharalar erekshe qyzyq­tyrdy.

Eń áýeli «Nazarbaev zııatker­lik mektepteri» DBBU basqarma tóraıymy Kúlásh Shámshıdınova men Astana qalasyndaǵy fızıka-matematıka baǵytyndaǵy Nazarbaev zııatkerlik mektebiniń dırektory Meıram Jákenovtiń tartýyn Aqmola oblysyndaǵy Qazqalashyq aýylynyń mektebi ıelendi. Qazqalashyq oqýshylary zııatkerlik mektepterdiń on jyl­dyǵyna oraı «Black & White» stýdııasy túsirip jatqan «10 jyl­dyq belester» atty derekti fılmniń keıipkerleri de boldy. Al Almaty qalasyndaǵy fızı­ka-matematıka baǵytyndaǵy Nazarbaev zııatkerlik mektebiniń qaýymdastyǵy jýyrda jaryq­qa shyqqan «Bastaý» atty oqýshy­lardyń shyǵarmalar jınaǵyn Jambyl aýdanynyń mektebine tabystasa, Shymkent óńirinde atalǵan aksııa senbilikten bas­taldy. Aımaqtaǵy hımııa-bıologııa baǵytyndaǵy Nazarbaev zııat­kerlik mektebiniń ustaz­dary men oqýshylary Tóle bı aýda­nyndaǵy Tasaryq aýy­lyna eki kún buryn arnaıy kelip mekteptiń qabyrǵalaryn be­zen­dirdi. Mundaǵy oqý orny­nyń ekinshi qabatyna qazaq­tyń áıgili ǵulamalary ál-Fara­bı, Abaı, Muhtar Áýezov, Ybyraı Altynsarın, Ahmet Baıtur­sy­novtyń asyl sózderi ja­zylǵan týyn­dylary ilinip, Qazaq­stan­nyń Tuńǵysh Prezıdenti Nursultan Nazarbaev buryshy já­ne aqparattyq stend ornalasty. 

– Áriptesterimizge elimizdegi jetekshi mektepterdiń úzdik oqy­týshylary men daryndy shákirtteri arnaıy kelip, buryn bolmaǵan mereke uıymdastyrdy, – deıdi Pavlodar oblysyndaǵy Maıqaıyń orta mektebiniń dırektory Samal Saqtasynqyzy. Onyń aıtýynsha, Baıanaýylda Nazarbaev mektebiniń kúni ótki­ziletinin estigen ózge de seriktes mektepterdiń muǵalimderi atal­ǵan sharaǵa arnaıy kelip, táji­rıbe alańyna qosylǵan eken.

«Nazarbaev zııatkerlik mek­tep­teri» derbes bilim berý uıy­­my basqarma tóraǵasynyń orynbasary Nazıpa Aıýbaeva Jambyl oblysyndaǵy Qostóbe orta mektebinde boldy. Ol óz kezdesýinde NIS Rrogramme oqytý baǵdarlamasynyń halyqaralyq deńgeıde moıyndalǵanyn ras­tady. «Bes jyl buryn jumy­symyzdy bastaǵanda kóbi kúdik­pen qarady. Búgin ujymdyq eńbek­tiń jemisin kórip otyrmyz. О́ıtkeni barlyq aımaqta qurylǵan Nazarbaev zııatkerlik mektep­teri orta bilim berý uıym­daryn jetelep keledi», dedi Nazıpa Altynbekqyzy. 

Osy ispetti «Oılaý dızaıny», úshtildilik, «CLIL» ádisi, «STEAM-XXI ǵasyrǵa qajetti daǵdy­lardy damytýdyń jańa joly» negizinde oqýshylardyń zert­teýshilik qabiletin arttyrý baǵytyndaǵy suraqtar Aqtó­be oblysynyń Mártók aýda­nyndaǵy Rodnıkov orta mek­tebinde talqyǵa tústi. «Qol­daıyq, aýyl mektebin!» aksııasy Atyraý oblysyndaǵy Jan­baı aýylynyń mádenıet úıin­­de qorytyndylandy. Mun­da atyraýlyq balalar Ábish Kekilbaevtyń «Aqyrǵy aıaldama» shyǵarmasyn sahnalyq drama jáne kóleńke teatry arqyly usyndy. 

Aksııaǵa Tuńǵysh Prezı­dent kitaphanasy qoldaý kór­setti. «Abyroı» ulttyq qun­dy­­lyqtardy damytý qory, belgili medıamenedjer Bı­bigúl Jeksenbaı myńdaǵan shyǵar­malardy, Muqaǵalı Maqa­taev­tyń óleńder jınaǵynyń elektrondy nusqasyn syıǵa tartty. Shalǵaıdaǵy mektepterge keń kólemdi kitap qoryn tabystaýǵa «Delovoı mır Astana» JShS erekshe qoldaý bildirdi. Al «Qazsınk» metallýrgııalyq kom­­panııasynyń qarjylaı qoldaýy­men 300-ge tarta fýtbol, basketbol jáne voleıbol doptary satyp alyndy.

Dýman ANASh,

«Egemen Qazaqstan»