Elbasy Joldaýynda jahandyq básekege qabilettilikti arttyrý maqsatynda ázirlengen «Sıfrly Qazaqstan» memlekettik baǵdarlamasy boıynsha óńirlerde kóptegen jumys atqarylýda. Bul baǵytta Aqmola oblysy Esil aýdandyq emhanasy stasıonar bólimderiniń 95 paıyzy elektrondy qujat aınalymyna kóshirildi.
Memleket basshysy alǵa qoıǵan mindetterdi júzege asyrý maqsatynda densaýlyq saqtaý salasyn sıfrlandyrý arqyly keshendi medısınalyq aqparattandyrý júıesin iske qosý, mobıldi qosymshalar men qazaqstandyqtardy mindetti medısınalyq saqtandyrýmen ózara tyǵyz baılanystaǵy elektrondy densaýlyq pasportyn paıdalaný, eń bastysy medısınalyq kómek sapasy men qoljetimdiligin arttyrý kózdelgen. Qazirgi tańda Esil aýdanynda 25220 adam tirkelse, aýdandyq emhananyń ár kabınetinde jáne áıelder men balalar konsýltasııasynda medısınalyq aqparattyq júıe kesheni baǵdarlamasy ornatylǵan. Osylaısha barlyq stasıonar bólimindegi elektrondy qujat aınalymy 95 paıyzǵa jetip otyr. Bul rette naýqas qaǵazyn berý, dárigerge jazylý jáne úıge shaqyrý elektrondy formatqa kóshirilgendigin basa aıta ketý kerek.
Árbir dárigerdiń kompıýterine engizilgen dárigerdiń jeke kabınetinde naýqasqa qatysty barlyq aqparat jınaqtalyp, burynǵy qaǵaz toltyrý qysqaryp, medısınalyq qyzmetkerlerdiń ýaqyty únemdeldi. Deı turǵanmen aýyldyq medısınalyq mekemelerde ınternet pen arnaıy tehnıkanyń bolmaýy sebebinen elektrondy qujat aınalymy aqsap otyr. Onyń ústine naýqastardyń telefonyna «DamuMed» gadjetin ornatý máselesi de qıynǵa soǵyp otyr. Osyǵan baılanysty ambýlatorlyq-emhana jáne stasıonar bólimderiniń qyzmetkerleri eńbek ujymdarymen kezdesýler ótkizip, túsindirý jumystaryn júrgizýde. Búgingi tańda mundaı «DamuMed» gadjeti 400 adamnyń baılanys qurylǵysyna ornatylyp, dárigerge jazylý jaǵynan óte yńǵaıly ekendigin dáleldedi.
Asqar TURAPBAIULY, «Egemen Qazaqstan»
Aqmola oblysy