29-30 maýsym kúnderi Almatydaǵy Ortalyq stadıonda jeńil atletıkadan Ǵusman Qosanovtyń memorıaly ótedi. Bul jarysqa Qazaqstannan bólek, О́zbekstan, Qyrǵyzstan, Túrikmenstan, Tájikstan, Ázerbaıjan, Grýzııa, Iran, Sırııa, Bahreın jáne Malaızııa sportshylary qatysady dep kútilýde.
Semeı óńiri týmasynyń esimi el sporty tarıhyndaǵy altyn áriptermen jazýly. Sevastopolde ásker qatarynda júrgende qysqa qashyqtyqta júgirýde keremet nátıje kórsetken Qosanov sol kezde-aq qyraǵy mamandar nazaryna ilikti. Qarýly kúshter jáne Ýkraına men Moldavııa birinshilikterinde jeńis tuǵyryna kóterilgen qazaqtyń uly kóp uzamaı halyqaralyq dodalarda daralana bastady. Al óziniń eń zor tabysyna ol 1960 jyly Rım Olımpıadasynda qol jetkizdi. Quramynda Ǵusman Qosanov, Leonıd Bartenev, Iýrıı Konovalov jáne Edvın Ozolın syndy saıypqyrandary bar KSRO komandasy jeńil atletterdiń 100 metrlik estafeta saıysynda kúmis medaldy ıelendi. Osylaısha, Qosanovtyń esimi tórt jyldyqtyń basty dodasynda júlde alǵan Qazaqstannyń tuńǵysh sportshysy retinde tarıhta qaldy.
Qandasymyz 1964 jyly Tokıoda alaýy tutanǵan Olımpııa oıyndaryna qatysty. Alaıda Japonııada bizdiń jigitterdiń joly bolmady. 1965 jyly Kıevte ótken KSRO men AQSh qurmalarynyń joldastyq kezdesýinde Keńes Odaǵynyń jelaıaqtary estafetalyq saıysta amerıkalyqtardy artqa tastady. Sol komandanyń sapynda bizdiń jelaıaq ta óner kórsetken edi. Al 100 metrge júgirýde qazaq sportshysynyń jeke rekordy – 10 mınýt 02 sekýnd.
Alashtyń abzal azamaty Ǵusman Qosanovty eske túsirýge arnalǵan atalǵan týrnır Almatyda 1991 jyldan beri úzdiksiz uıymdastyrylyp keledi. Halyqaralyq jeńil atletıka qaýymdastyǵynyń kúntizbesine engen bul jarystyń jalaýy bıyl 28-shi márte jelbireıdi.
Ǵalym SÚLEIMEN, «Egemen Qazaqstan»
ALMATY