Bul sýrettegi eńseli eskertkish – jyr alyby Jambyl Jabaevtyń kindik qany tamǵan ólkedegi asqaq beınesi. Uzynaǵash aýlyna kireberis kóshede boı kótergen tuǵyr jaqynda ashyldy.
Jalpy, arýaqty aqynnyń eskertkishteri elimizdiń barlyq aımaǵynda ǵana emes, birqatar shet memleketterde de bar. Mysalǵa, Almaty oblysy ákimdiginiń muryndyq bolýymen sońǵy 4-5 jyl aralyǵynda Kıev pen Belgrad qalalarynda Jambyl beınesi tasqa qashalǵan bolatyn. Al jyr alyby attas aýdannyń ortalyǵyndaǵy eskertkishti osy óńirdiń azamattary bas bolyp, jeke qarjylaryna jasatqan eken.
– Bıyl bizdiń aýdannyń Qastek aýdany bolyp qurylǵanyna 90 jyl ári Jambyl atyn ıelengenine 80 jyl tolyp otyr. Osyǵan oraı aýdan ortalyǵyna Jambyl baba eskertkishin ornatý týraly kópshilik bastama kótergen edi. Sóıtip «Týǵan jerge taǵzym» degen qor quryldy. Aǵaıyndar qorǵa qarjy jınaqtap, eskertkishtiń ashylýyna uıytqy boldy, – deıdi istiń basy-qasynda júrgen qadirmendi aqsaqal Áskerbek Abaev.
Mine, endi belgili músinshi Qazbek Jarylǵapovtyń qolynan shyqqan qola músin qazir Uzynaǵashtaǵy «Aqyndar men batyrlar eli» saıabaǵynyń sánin keltirip tur.
Jalpy, Almaty oblysynda «Rýhanı jańǵyrý» baǵdarlamasy aıasynda qolǵa alynǵan sharalardyń qatarynda ulttyń uly tulǵalarynyń esimin ardaqtap, aýyldarda eskertkish turǵyzý sátti júzege asyp jatyr. Jyr alybyna qoıylǵan eskertkish – sonyń bir jarqyn kórinisi.
Qalmahanbet MUQAMETQALI, «Egemen Qazaqstan»
Almaty oblysy