Jambyl jol bólimshesiniń Shý stansasynda «Qazaqstan temir joly» UK» AQ basqarma tóraǵasy Qanat Alpysbaev, Investısııalar jáne damý mınıstrligi Kólikterdi baqylaý komıtetiniń tóraǵasy Áset Asaýbaev «Astana – Almaty» jolaýshylar poıyzynyń joldan shyǵyp ketýine qatysty oqıǵa boıynsha jýrnalıstermen brıfıng ótkizdi.
Sondaı-aq brıfıngke Jambyl oblysy Tótenshe jaǵdaılar departamentiniń ókilderi de qatysty. Q.Alpysbaev zardap shekkenderdi qoldaýdyń barlyq múmkin sharalary jasalyp jatqandyǵyna toqtaldy. Qazaqstan Respýblıkasy zańnamasy bekitken tólemderden ózge, «Qazaqstan temir joly» ulttyq kompanııasy qazaly otbasyna 2 mıllıonnan astam teńge, zardap shekkenderge alǵan jaraqattarynyń densaýlyǵyna keltirgen zalalynyń aýyrlyǵyna baılanysty 500 myń teńgeden 1 mıllıon teńgege deıin qarjy beredi, dedi.
Sondaı-aq, jolaýshylar «Jolaýshylar tasymaly» AQ-tyń «NSK» saqtandyrý kompanııasymen ótken jyly jasasqan kelisimshartyna oraı tıisti ótemaqy ala alatyny belgili boldy. Saqtandyrý kompanııasynyń qosymsha ótemaqy tóleý máselesi «QTJ» UK» AAQ-tyń erekshe baqylaýynda tur eken. Q.Alpysbaevtyń aıtýynsha, «QTJ» UK» AQ janynan jedel shtab quryldy. Ol vagondardyń joldan shyǵyp ketýine qatysty barlyq zardaptardy joıýdyń sharalaryn úılestiredi. Arnaıy komıssııa oqıǵanyń sebebin saraptaýda. Onyń nátıjesi qosymsha habarlanatyn bolady.
«Egemen-aqparat»