Álem chempıonatynyń tórtinshi kúni ortańqol quramalar sanatyndaǵylar tórge ozdy. Al birinshiliktiń basty favorıtteri upaıdan shashaý shyǵardy. Brazılııa kútpegen jerden Shveısarııamen teń tússe, álem chempıony Germanııa Meksıkadan jeńilip qaldy. Jahandyq jarystyń alǵashqy qyzyqtary osylaı bastaldy.
40 jyldan keıingi sátsizdik
Dál osynshama jyl boıy álem chempıonattaryndaǵy alǵashqy oıyndarynda Brazılııa eshqashan upaıdan shashaý shyǵarmapty. Alǵashqy oıyndaryn únemi jeńispen bastap otyrǵan eken. Shveısarııaǵa qarsy ótken oıyn brazılııalyqtar úshin jaqsy bastalyp edi. Kezdesýdiń 20-mınýtynda Felıpe Koýtıno alystan joıqyn soqqy baǵyttap, esep ashqan.
Alaıda «selesao» oıynshylary basymdyqty ustap tura almady. Ekinshi taımda Shveısarııa fýtbolshysy Sýber tarazy basyn teńestirdi. Neımar, Jezýs, Koýtıno, Fırmıno bastaǵan saıypqyrandar qansha shabýyldaǵanymen, jeńisti golǵa shamalary jetpedi. Álemniń 5 dúrkin chempıony Brazılııa endi 22 maýsym kúni Kosta-Rıkamen kezdesedi.
Janardan aqqan jeńistiń jasy
Germanııa álem chempıony bola tura, alǵashqy oıynyn jeńilispen bastady. Meksıka quramasy kishigirim sensasııa jasady. Kolýmbııalyq bapker Osarıonyń keremet taktıkasynyń arqasynda Meksıka 1:0 esebimen býndes komandadan basym tústi. Oıyn aıaqtalǵan soń Meksıka shabýylshysy Haver Ernandes janaryna jas aldy. Bul eldiń jankúıerleri de álem kýbogin utqandaı qýanyp, Máskeýde úlken toı jasady.
Aıta keteıik 1998 jyly chempıon bolǵan Fransııa kelesi birinshilikti jeńilispen bastaǵan. Al odan keıin Italııa men Ispanııa da týra osyndaı jaǵdaıdy bastan ótkerip edi.
Meksıka quramasy endi 23 maýsym kúni Ońtústik Koreıamen kezdesedi.
Kalınıch komandadan qýylýy múmkin
Horvatııa quramasynyń shabýylshysy Nıkola Kalınıch komandadan qýylýy múmkin dep habarlady álemdik BAQ. Komandanyń bas bapkeri Zlatko Dalıch Nıkolany Nıgerııaǵa qarsy ótken oıynnyń 85-mınýtynda alańǵa shyǵarmaqshy bolǵan. Alaıda Nıkola alańǵa shyǵýdan bas tartady. Bapker tapsyrmasyn oryndamaǵany úshin ol komandadan qýylatyn sekildi.
Horvatııalyq tilshilerdiń jazýy boıynsha, «Mılan» sapynda óner kórsetetin Kalınıch bapkerge burynnan rıza emes eken. Negizgi quramda alańǵa shyǵýdy josparlaǵan Nıkola qosalqy quramda qalǵanyna qatty qapalanǵan. Bul oqıǵa «shaqpaq jeıdeliler» úshin jaǵymsyz áser bergeni anyq. Esterińizge sala ketsek, Horvatııa Nıgerııany sol oıynda 2:0 esebimen jeńgen edi.
Pogba golynan aıyryldy
FIFA Fransııa quramasynyń jartylaı qorǵaýshysy Pol Pogbanyń soqqan golyn Ázız Behıchtiń atyna jazdy. Fransııa – Aýstralııa arasyndaǵy oıynnyń 81-mınýtynda Pol Pogba qarbalasqan sátte qaqpaǵa gol soǵyp, Fransııa jeńisti julyp áketti. Tóreshiler hattamaǵa gol avtory Pol Pogba dep jazdy. Biraq keıinnen beıneqaıtalaýdan anyqtalǵandaı, goldyń avtory Aýstralııa quramasynyń qorǵaýshysy Ázız Behıch eken. Jańadan engizilgen beıneqaıtalaý júıesi osyndaı sheshimge kelipti. Endi búkil statıstıkalyq hattamalardyń barlyǵynda ketken olqylyq qaıta túzetiledi.
Fransııa quramasy kelesi oıynyn 21 maýsym kúni Perýge qarsy ótkizedi.
Ermuhamed MÁÝLEN, «Egemen Qazaqstan»