Ulttyq bank «7-20-25. Árbir otbasyna baspana alýdyń jańa múmkindikterin berý» ıpotekalyq turǵyn úı kredıtteý baǵdarlamasyn bekitti, dep habarlaıdy QazAqparat.
«Baǵdarlama aıasynda qatysýshy bankterge qatysty ólshemsharttar aıqyndalatyn bolady. Qatysýshy bankterdiń tizbesi olar «Baspana» ıpotekalyq uıymy» AQ-men tıisti sharttar jasasqan soń Qazaqstan Respýblıkasy Ulttyq bankiniń resmı ınternet-resýrsynda jarııalanady. Baǵdarlamanyń talaptaryna sáıkes qatysýshy bankterdiń qaryzdar berý jáne qyzmet kórsetý úshin qaryz alýshylardan komıssııa alýǵa quqyǵy joq»,- delingen Ulttyq bank taratqan aqparatta.
Sonymen qatar qatysýshy bankterdiń qaryzdardy berý rásimderiniń bastalǵany týraly aqparat Qazaqstan Ulttyq bankiniń saıtynda da ornalastyryldy. «7-20-25» baǵdarlamasyn iske asyra bastaýdyń kútiletin merzimi - aǵymdaǵy jyldyń ekinshi jartysy.
«7-20-25» baǵdarlamanyń talaptaryn túsindirý úshin Qazaqstan Ulttyq bankiniń «QUB «Online» mobıldik qosymshasynda 2018 jylǵy 19 maýsymnan bastap «7-20-25» jańa bólimi iske qosyldy, onda osy baǵdarlamaǵa qatysty qyzyǵýshylyq týdyratyn suraqtarǵa jedel jaýap alýǵa bolady.
Aıta keterligi, baǵdarlama Memleket basshysynyń 2018 jylǵy 5 naýryzdaǵy halyqqa arnalǵan «Prezıdenttiń bes áleýmettik bastamasy» úndeýinde aıtylǵan birinshi áleýmettik bastamany iske asyrý aıasynda ázirlendi. Baǵdarlamaǵa Qazaqstan Respýblıkasynyń eńbek jáne (nemese) kásipkerlik qyzmetten alatyn tabysy bar, sondaı-aq menshik quqyǵynda turǵyn úıi joq kez kelgen azamaty qatysa alady.
Elimizdiń kez kelgen óńirinde bastapqy naryqta turǵyn úı satyp alý úshin mynadaı qun sheginde ıpotekalyq turǵyn úı qaryzyn alý múmkindigi qaralady: 25 mln teńge - Astana, Almaty, Aqtaý jáne Atyraý qalalarynda; 15 mln teńge - basqa óńirlerde.
Baǵdarlamanyń operatory Qazaqstan Respýblıkasy Ulttyq bankiniń enshiles uıymy «Baspana» ıpotekalyq uıymy» AQ. Operator oblıgasııalardy shyǵarý jáne ornalastyrý esebinen qarjylandyrýdyń naryqtyq tetikterin paıdalana otyryp Qazaqstan qor bırjasyna (KASE) keminde 1 trln teńgeni tartady jáne túsken qarajatty baǵdarlamanyń talaptary boıynsha qatysýshy bankter bergen ıpotekalyq turǵyn úı qaryzdaryn satyp alýǵa baǵyttaıdy.