Búgin Úkimet otyrysynda «Qazaqstan temirjoly» ulttyq kompanııasynyń basshysy Qanat Alpysbaev Astana-Almaty baǵytyndaǵy poıyzdyń apatqa ushyraý sebebiniń aldyn ala nátıjesin jarııalady.
«Buǵan deıin poıyzdyń olaı joldan shyǵyp ketý oqıǵalary bolmaǵan. Sebebi texnıkalyq jaǵynan túsiniksiz jaıttar kóp. Atap aıtqanda, jolaýshylar poıyzy túzý jolda aýdarylyp ketken. Sosyn ol jerdegi temirjoldyń dıagnostıkasy aǵymdaǵy jyly 6 maýsym kúni júrgizildi. Sol kezde eshqandaı kemshilikter anyqtalmaǵan. Atalǵan ýchaskede saǵatyna 100 shaqyrymmen júrýge bolady. Al qulaǵan poıyz 93 shaqyrymmen júrgen. Negizi, relster jáne basqa da qosymsha bólshekter tek 60 prosentke paıdalanylǵan bolatyn», - dedi Q.Alpysbaev.
Búginde kompanııa basshysy apat bolǵan jerde júr. О́z baıandamasyn ol onlaın baılanys arqyly jasady. Onyń aıtýynsha, Shýdaǵy apat boıynsha tekserý jumystary jalǵasýda. Oǵan otandyq jáne reseılik mamandar tartylyp otyr.
«Komıssııa qatar turǵan jolmen júk poıyzyn júrgizip kórdi. Osy synaqtyń nátıjesinde jolaýshylar poıyzynyń joldan shyǵyp ketýine basqa poıyzdyń áser etpegeni anyqtaldy», - dep atap kórsetti Q.Alpysbaev.
Aıta keteıik, tekserý komıssııanyń jumysy osy aıdyń aıaǵyna deıin jalǵasady. «Qazaqstan temir joly» ulttyq kompanııasy qaıtys bolǵan jasóspirimniń otbasyna 2 405 000 teńge kóleminde ótemaqy tólep beredi. Budan bólek, jaraqat alǵan azamattarǵa 500 000 - 1 000 000 teńge kóleminde ótemaqy beriledi.