19 jasynda maıdan dalasyna attanǵan jas sarbaz týǵan jerimen qaıta qaýysha almady. Quspanǵalı Boranbaev sol kezdegi Gýrev oblysy, Teńiz aýdany Qyzyltý kolhozynan 1941 jyly soǵysqa alynyp, 28-shi atqyshtar dıvızııasynyń quramynda shaıqasqan edi. 1942 jyly Reseıdiń Novgorod oblysy Parfınskıı aýdany mańynda erlikpen qaza tapty. Osylaı bir ǵumyr qyrshynynan qıyldy. Bir otaýdyń oty jaǵylmady.
Odan beri de 70 jyldan astam ýaqyt ótip ketti. Aqtóbe qalasyndaǵy Álııa Moldaǵulova atyndaǵy jáne Iаroslav oblysy, Rybınsk qalasynyń «Za Otvagý» izdeý toptary birlesip, soǵys órti sharpyǵan ormandy daladan sarbazdyń jerlengen jerin tapty. Atyraý oblystyq mádenıet, arhıvter jáne qujattama basqarmasynyń basshysy Salamat Sabyr: «Qaza tapqan jaýyngerdiń súıegi tabylǵan jerden aty-jóni oıylyp jazylǵan as ishetin qasyǵy da shyqty. Osy jádigerdiń arqasynda jaýyngerdiń esimi, týǵan jeri anyqtalyp, súıekti eline qaıtarý úshin Atyraý oblysy basshylyǵynyń qoldaýymen arnaıy delegasııa uıymdastyryldy», deıdi.
El zııalylarynyń qatysýymen jaýyngerdiń súıegi 20 maýsym kúni Atyraý qalasyna ákelinip, oblys ortalyǵyndaǵy Jeńis saıabaǵynda qaraly mıtıngi ótti. Soǵys jáne eńbek ardagerleri, jastar men oqýshylar, zııaly qaýym ókilderi qatysqan jıynda oblys ákimi Nurlan Noǵaev: «Elbasymyz N.Á.Nazarbaev «Eren eńbekteri, úlgi tutar isteri, ójet minezderimen maıdanda ǵana emes, beıbit ómirde de bizge úlgi bolyp júrgen soǵys ardagerlerine qurmet kórsetý paryzymyz» degen bolatyn. Ata-babasy ustanǵan ustanymyna adal bolyp, maıdanǵa attanyp, sol jerde erlikpen qaza bolǵan jerlesimizdiń eńbegi búginge deıin jetti. Alaıda týǵan topyraǵy buıyrmaı keldi. Búgin Quspanǵalı Boranbaev úshin jeńis kúni týdy», dep atap ótti.
Shynynda da, qazaq úshin týǵan topyraqtan qasterli dúnıe joq. «Aǵamyzdyń súıegin týystary jatqan qaýymǵa jerleımiz. Kóńilimiz tolqyp tur. Osyndaı múmkindik jasaǵan oblys basshylyǵyna aǵaıyndar atynan alǵys aıtamyn. Aýylǵa baryp, ata saltymen as beremiz», – deıdi maıdangerdiń týysy Zlıha Dúısekenova. Jeńis saıabaǵyndaǵy qaraly mıtıngten keıin jaýyngerdiń súıegi týǵan jeri Qurmanǵazy aýdanyna jol tartty.
Jastaıynan zulmat zamannyń zulymdyǵyn júreginen ótkizip, maıdan dalasynda ómiri qıylǵan batyr osylaısha týǵan topyraǵymen qaýyshty. Ańdaǵan adamǵa bul da eldiń eldigi kórinetin tus.
Baqytgúl BABASh,
«Egemen Qazaqstan»
ATYRAÝ