1 qańtar – jańa ǵasyrdyń alǵashqy kúni Elbasy Nursultan Nazarbaevtyń Jarlyǵymen «Mádenıetti qoldaý jyly» dep jarııa- lanyp, atalmysh sharanyń betashar rásimi retinde bas qalada «Myńjyldyq – Dýman – Astana» atty merekelik baǵdarlama qolǵa alyndy. Jańa myńjyldyqty qarsy alý saltanaty qaladaǵy «Alataý» sport saraıynda ótti.
4 qańtar – elorda mártebesin kóterip, halyqaralyq mádenı-sporttyq sharalar uıymdastyrý baǵdarlamasy aıasynda Qazaqstan jáne Kýba eliniń bokstan ulttyq qurama músheleri Astanada joldastyq jekpe-jek ótkizdi. Dańqty sportshy, olımpııa oıyndarynyń 3 dúrkin, álem chempıonatynyń bes dúrkin jeńimpazy Felıks Savon bastap kelgen kýbalyqtardy elimiz bylǵary qolǵap sheberleri 6:4 esebimen utty.
14 qańtar – Arqa tósinde tuńǵysh ret qazaq ánderi festıvali uıymdastyrylyp, oǵan oblystardan tanymal ánshiler shaqyryldy. Úzdik dep tanylǵan ónerpazdar elordanyń mádenı tynysyna úles qosýǵa shaqyryldy.
18 qańtar – el ortalyǵy Arqa tósine aýysqan sátten bastap, burynǵy astana Almaty qalasymen barys-kelis kúsheıdi. Osy oraıda qalaaralyq avtomobıl jolyn jaqsartý jóninde Elbasy atqarýshy bılikke arnaıy tapsyrma júktep, osy másele Úkimet músheleriniń kezekti otyrysynda keńinen talqylanyp, nátıjesinde 1200 shaqyrymdyq joldy az ǵana merzimde tolyq jaraqtap, qurylys jumystaryn jedel júrgizý jaıly sheshim qabyldandy.
27 qańtar – Qazaqstan Prezıdenti N.Nazarbaev Astananyń bas josparymen jan-jaqty tanysty. Elbasyna qala ákimi Á.Jaqsybekov pen bas arhıtektor B.Dosmaǵanbetov jańa jobany jiktep-jiliktep túsindirip shyqty. Bul jobada – qazirgi Prezıdent rezıdensııasy, «Nur Astana» meshiti, sonymen qatar eki ortany jalǵap jatqan «Transoıl» kompanııasynyń ǵımaraty qatarly asa aýqymdy nysandar qarastyrylǵan-tyn. Joba maquldanǵan soń Úkimet qurylys jumysyn bastady. Bul kúnge Nursultan Ábishuly «Astana qaqpasy ashylǵan sát» dep baǵa berdi.
12 aqpan – Elbasy Nursultan Nazarbaev elorda mádenı oshaqtaryn aralap, memlekettik opera jáne balet teatry qurylysyn tez arada bitirýdi tapsyrdy. Segiz aıdan keıin Kúlásh Baıseıitova atyndaǵy opera jáne balet teatry Muqan Tólebaevtyń «Birjan–Sara» operasymen shymyldyǵyn ashty.
22 aqpan – Elbasy bas qalada salynyp jatqan Prezıdenttik mádenıet ortalyǵynyń qurylysymen (qazirgi Áskerı-tarıhı mýzeı) tanysyp, «Baıyrǵy kóshpendiler mádenıeti» atty zalǵa ózine mańǵystaýlyqtar syılaǵan kıiz úıdi ornalastyrýdy tapsyrdy. Ortalyq segiz aıdan keıin 28 qazan kúni Prezıdenttiń qatysýymen ashyldy.
30 naýryz – tórt jyldyń (1996 jyl) aldynda «Shanhaı bestigi» degen atpen qurylyp, keıin «Shanhaı Yntymaqtastyq Uıymy» ataýyna ıe bolǵan bedeldi halyqaralyq uıym músheleri Astanada bas qosty.
29 sáýir – elorda basshysy Á.Jaqsybekov Uly Jeńis merekesi qarsańynda 18 maıdangerge «Tavrııa» jeńil avtokóliginiń kilti men 26 soǵys ardagerine páter kiltin tabys etti.
13 maýsym – Elbasynyń qatysýymen L.N.Gýmılev atyndaǵy Eýrazııa ulttyq ýnıversıtetiniń jańa ǵımaraty ashyldy.
20 shilde – Premer-mınıstr Q.Toqaevtyń tóraǵalyq etýimen Úkimet músheleri qatysqan keń kólemde májilis ótip, onda «Astana qalasyn damytý tujyrymdamasy» talqylandy.
12 tamyz – Astananyń rýhanı suranysyn qanaǵattandyrý úshin qazaq tilinde ádebı shyǵarmalar saýdalaıtyn «Abaı» kitap dúkeni ashyldy. 15 tamyz – Esil ózeniniń qala ornalasqan ón boıyn sharlaı júzip, qonaqtarǵa shahar kórkin tanystyratyn «Aqbulaq» saıahat kemesi júre bastady. 22 tamyz – qalanyń irgesindegi eldi mekender «Kúıgenjar», «Mıchýrın», «Prıgorodnoe», «Internasıonalnyı», «Ýchhoz», «Kóktal» aýyldary bas shahar quramyna enip, elorda aýmaǵy ulǵaıdy.
4 qarasha – Astanadan 30 shaqyrym jerdegi Rojdestvenka aýylynyń mańynda Qarakereı Qabanbaı batyr kesenesiniń saltanatty ashylýy boldy. 10 jeltoqsan – Aqmola qalasy úsh jyl buryn (1997 jyly) elimizdiń jańa astanasy dep tanylǵan tarıhı kúnge oraı Kongress-holda saltanatty jıyn ótti. Merekelik shara ústinde qala basshysy Á.Jaqsybekov Q.Qýanyshbaev atyndaǵy Qazaq mýzykalyq drama teatrynyń kórkemdik jetekshisi Ázirbaıjan Mámbetovke «Astana qalasynyń qurmetti azamaty» ataǵyn tapsyrdy.
16 jeltoqsan – Táýelsizdik toıyna tartý retinde elordany «Alataý» sport saraıynyń tuńǵysh ret qazaqsha kúresten alǵashqy ulttyq chempıonat uıymdastyryldy. Túıe balýanǵa Qazaqsha kúres federasııasynyń prezıdenti Muhtar Qul-Muhammed jeńil kólik tigip, ol balýan Eldos Yqsanǵalıvke buıyrdy.
Daıyndaǵan Beken QAIRATULY, «Egemen Qazaqstan»