Jaǵymdy jańalyq júregimizge jyly uıalap, janymyzdy jadyratty. Elbasymyzdyń sheshimimen shildeniń birinshi jeksenbisi Ulttyq dombyra kúni bolyp jarııalandy. Jyl saıyn atap ótilmek bul merekelik kúnniń ulttyq rýhanııatymyzǵa qosar úlesi salmaqty bolmaq.
Dombyra – qazaqtyń kıesi, qasıeti, qazynasy. Qazaq pen dombyra egiz uǵym ǵoı! Kúni keshege deıin ár úıdiń tórinde ilýli turatyn ulttyq aspabymyzdyń kúmbirlegen úni búginde alystap bara jatqandaı edi. Telearnalardan dombyranyń daýysyn estý muńǵa aınalǵany bylaı tursyn (onyń ornyn salmaqsyz baǵdarlamalardyń jaýlap alǵany shyndyq), shildehana, besik toıy, tusaýkeser, tilashar, betasharlarymyz dańǵyrlaǵan estarada áýenine baılanbady ma? Dombyramen áýelete shyrqalyp, tıesili syılyq ıesin tabatyn «Toıbastar» dástúriniń túr-sıpaty múlde ózgergenine bárimiz kýámiz. Qurmetti qonaq kelgende «aýyldyń alty aýyzy» aıtylyp, «qonaqkádemen» jalǵasa ánmen óriletin otyrystar kózden bul-bul ushqaly qashan?! Arasynda úlkenderdiń ádemi áńgimeleri tyńdalatyn. Qazir she? Iship-jep bolǵan soń, bas salyp bı bıleý- ge kóshedi. Jas ta, jasamys ta sekeńdep, ııý-qııý mýzyka, qyzyq degen osy dep túsinetin boldyq. Ilgeridegi qudalardy áýdem jerden arnaý aıtyp qarsy alyp, kúmbir-kúmbir kúı tartyp, shyǵaryp salar kez qaıda, shirkin?! Dombyrada aıtylatyn ár ánniń sózi qandaı, sazy qandaı?! Tyńdap otyrǵanyńda bir kúrsintip, bir muńaıtyp, myń túrli áserge bóleıtini bar. Onyń qudiretti únin estigenińe shúkirlik etesiń. Dombyranyń ıesi qazaq bolyp týylǵanyńa táýbe deısiń, basqa emes.
Dombyra kúniniń belgilenýi jaıdan-jaı emes. Bul rýhanı jańǵyrý baǵytyndaǵy eń súbeli tirliktiń biri bolmaq. Osy kúnniń aıasynda ulttyq aspabymyzdy ulyqtaý maqsatynda tyń bastamalar boı kóterip, kópten beri qoldaý tappaı júrgen ıgi dúnıeler qaıta jańǵyrýy ǵajap emes. Kóp nárseden úmittimiz. Kók sandyqtan dombyra únimen astastyrylǵan salmaqty dúnıelerdiń kóptep jaryq kórýin janymyz qalaıdy. Eń durysy, naýqanshylyqtan ada, ásireqyzyl tez ońarlyq tirlik emes, óziniń qońyr úni men qońyr bolmysyna saı, ultymyzdyń jadyn qaıta bir jańǵyrtatyndaı kún bolsa eken deımiz.
Bıylǵy shilde aıynyń birinshi jeksenbisi 1 shildege týra kelip tur. «Jazdykún shilde bolǵanda...» dep Abaı atamyz aıtqandaı, «kókoraı shalǵyn, báısheshek, uzaryp, ósip, tolǵanda» búkil qazaq dalasy kúmbir-kúmbir kúı tókkeı, kóktegi kún nur tókkeı, dombyrasyn qolǵa alǵaı, áýelete án salǵaı... «Darıǵa, dombyramdy bershi maǵan, Janyma kelshi jarym, kelshi balam...» dep Muqaǵalısha tolǵaıyq, «Naǵyz qazaq qazaq emes, naǵyz qazaq – dombyra!» dep Qadyrsha qaıyraıyq! Uly ulttyń balasy, ulyqta Dombyrańdy!
Zeberkúl Shardarbekova