– Iá, jigitter, kep qapsyńdar, – dedi ormanshy úzeńgiden aıaǵyn bosatyp jatyp.
Qımyly shıraq eken. At tizginin nemeresine ustatty da, bizdi baýǵa qaraı bastaı jóneldi.
– Aqsaqal, myna baqty bireý ekken be, joq álde, ózi osylaı ósip-óngen be?!. – dep suradyq biz tańyrqap.
Taý jotalaryndaǵy alma, órik, alsha, qara órik aǵashtary ıilip, jemisin ázer kóterip tur. Rasynda da, tańǵajaıyp baq. Túndegi jaýǵan jańbyr tamshylary qalyń japyraqtardyń arasynan syǵalap, kún kózine shaǵylysyp jalt-jult etedi.
– E-e, – dedi qart ormanshy qarsy aldymyzdaǵy baqqa qarap kúlimsirep. – Buryn bul taýda tek jabaıy alma ǵana ósýshi edi ǵoı. Endi mine, ózderiń kýásińder... Jemisimdi úzip al da jeı ber dep turǵan joq pa?!. Odan qalsa, sómkelerińdi toltyryp ala ketińder. El úshin egilgen baq qoı bul!.. Ormanshy qarttyń ózi de, sózi de bizge sondaı qyzyq kórinedi. Tap bir kún shýaǵynan jaralyp, ǵaıyptan paıda bola ketken ertegidegi danagóı qarııa sekildi.
«El úshin... Qyzyq eken? – degen oı keledi basymyzǵa. – Baq túgili, jerde jatqan zattyń da óz ıesi bar emes pe?..»
– Iá, – dep kúlimsiredi qart ormanshy bizdiń oıymyzdy kózimizden oqyp turǵandaı basyn ızep. – Qazir men senderge bul baýdyń qyzyq tarıhyn aıtyp beremin...
Sóıtti de ol áńgimesin bastap ketti.
* * *
– Biz maıdanǵa attanatyn kúni taý jaqtan alyp-ushyp jetken jezdem jaryqtyq: «Apyr-aı, estigen zamatta asyǵyp, aldy-artyma qaramaı shaba jóneldim. Jol-jónekeı qolyma bar ilikkeni osy boldy. Týǵan jerdiń jemisi ǵoı. Tym qurysa, osyny jolyńa ala ket», dep bir dorba alma usyndy. Kókjıekke batyp bara jatqan kún sııaqty qyp-qyzyl, dop-domalaq jemisterdi keýdeme qysyp, uzaı berdim.
Keshkilik stansadan «taýarnyı poıyzǵa» mingenimizde barlyǵyn qasymdaǵy jigitterge úlestirip berdim de, ózime alyp qalǵan bireýin jolqapshyǵyma salyp, kópke deıin saqtap júrdim. Aýyl eske túskende, mine, búıtip... murnyma taqap, ıiskep-ıiskep qoıamyn...
Áne, sol kezde alǵash ret: «Osydan elge aman-esen oralsam, Táńirtaýdyń bókterine baý ósirip, armansyz ómir súrer em-aý!» dep oılaǵam. Mine, bul baq – meniń sol armanymnyń jemisi!
* * *
Sodan beri de talaı ýaqyt ótti arada.
Baıaǵy Ekinshi dúnıejúzilik soǵysqa qatysyp, Reseı, Karelııa, Zapolıare, Norvegııa, Polsha jerlerin aralap ótip, aýylǵa aman-esen oralǵannan keıin qazirgi Túrkistan oblysyndaǵy Saıramsý qoryǵynda ormanshy bolyp jumys istegen Ekinshi dárejeli «Dańq» ordeniniń kavaleri Áýel Ysqaqov atamyzdyń osy bir áńgimesi eshqashan da esimnen shyqpaıdy.
Nurǵalı ORAZ, «Egemen Qazaqstan»