Ortalyq kommýnıkasııalar qyzmetinde «Báıterek» ulttyq basqarýshy holdıngi» AQ basqarma tóraǵasynyń orynbasary Ánýar Omarqojaevtyń qatysýymen «Qazaqstan Respýblıkasynyń Prezıdenti N.Á.Nazarbaevtyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Joldaýyn iske asyrý sheńberinde «Bir tereze» qaǵıdasyn qoldaný arqyly bıznesti memlekettik qoldaý úderisterin sıfrlandyrý barysy» taqyrybynda baspasóz máslıhaty ótti.
Á.Omarqojaev óz sózinde «Báıterek» holdıngi iri qarjylyq damý ınstıtýty retinde óz qyzmetin sıfrlandyrý máselelerin júıeli atqarýdy jolǵa qoıǵanyn atap ótti. Sondaı-aq spıker qazirgi ýaqytta «Digital Baiterek» jobasyn iske qosýdyń arqasynda holdıng bıznesti memlekettik qoldaý sharalaryn sıfrlandyrýdy júzege asyryp jatqandyǵyn sóz etti.
«Atap aıtqanda, holdıngtiń 2018-2023 jyldarǵa arnalǵan sıfrlandyrý strategııasy júzege asyrylýda, onda qyzmetiniń alty negizgi baǵyty jáne jıyrma naqty sıfrlyq qadam belgilendi. Búgingi kúni holdıngtiń 19 qyzmeti avtomattandyrylǵan. Bul – «Báıterek» UBH» AQ-tyń barlyq qyzmetteriniń 70 paıyzy. «Báıterek» holdıngi kóp jyldan beri sıfrlandyrý jumystaryn júıeli túrde júrgizip keledi. Bul rette holdıngtiń «Elektrondy úkimet» portaly sheńberinde bıznesti qoldaý boıynsha oń tájirıbesi bar. Sıfrlandyrýdyń sońǵy nátıjesi – holdıng jumysynyń tıimdiligin arttyrý, qarajat pen ýaqytty únemdeý, azamattardyń bizdiń qyzmetterimizge qoljetimdiligin qamtamasyz etý jáne barlyq klıentterge baǵdarlanǵan prosesterdiń ashyqtyǵyn qamtamasyz etý. Biz barlyq qyzmetterimizdi sıfrlandyrýǵa jáne holdıngtiń biryńǵaı sıfrlyq ekojúıesin jasaýǵa tyrysamyz», dedi Á.Omarqojaev óz sózinde.
Raýan QAIDAR,
«Egemen Qazaqstan»