Elbasy «Evrazııa júreginde» kitabynda «Astananyń damýy – Qazaqstannyń damýy» degen qarapaıym da uǵynyqty formýlany usynyp, búgingi kúni bul baǵytta úılesimdi túrde atqarylǵan jumystardyń nátıjesi boıynsha ózara tyǵyz yqpaldastyqqa negizdelgen keshendi sharalardyń júzege asyrylǵanyn baıqaý qıyn emes. Astananyń tikeleı yqpalynyń nátıjesinde basqa oblys ortalyqtarynda, bir jaǵynan, Astananyń qajetin qanaǵattandyrýǵa arnalǵan salalar paıda bolyp, damı bastasa, ekinshi jaǵynan, budan qalanyń óz qajettilikterine de qozǵaý salǵany kópshilikke aıan. Prezıdentimizdiń «Elorda memlekettiń tutastaı alǵandaǵy damý qarqyny men sıpatyn aıqyndaıdy.
Mysaly, Astanada qabyldanǵan eldiń ındýstrıaldyq-ınnovasııalyq damý baǵdarlamasy suranys pen usynys naryǵyn qala aýmaǵynda ǵana emes, búkil respýblıka boıynsha qalyptastyrýǵa jol ashty» deýi aıqyn aqıqatqa aınalyp, úzdiksiz progress pen turaqty órkendeý jolynyń bastaýy bolǵanyn soltústikqazaqstandyqtar da árkez maqtanysh etedi. Bas qalaǵa qarap oı da, boı da túzep kele jatqan teriskeılikter osydan birer jyl buryn Bógenbaı jáne Jeńis kósheleri qıylysynda saıabaq turǵyzyp, tartý etse, bıyl jalpy uzyndyǵy 56 shaqyrymdy quraıtyn velotrassanyń salynýyna óz úlesterin qosty. Ony paıdalanýǵa berýge 30 shaqty tehnıka, 50-den astam adam jumyldyrylyp, jol jıekterine 160 aspaly sham, 25 qoqys jáshigi ornatyldy, dedi sóıleskenimizde «Jolqurylys-NS» JShS-niń ýchaske jetekshisi Dosbol Jolmaǵanbetov.
«Astananyń gúldenýi – Qazaqstannyń gúldenýi» memlekettik baǵdarlamasy aıasynda toǵyz joldyń torabynda ornalasqan Petropavl qalasy da ósip-órkendep keledi. Jýyrda Nursultan Ábishulynyń tikeleı tapsyrmasyna oraı Soltústik Qazaqstan oblysynyń 2018-2021 jyldarǵa arnalǵan keshendi damý jospary túzilip, 64 is-sharany iske qosý belgilendi. Ol boıynsha 12 baǵytty qamtıtyn jobalar sheńberinde áleýmettik nysandar, kólik jáne ınjenerlik kommýnıkasııalar, agroónerkásip, qorǵanys obektileri jańǵyrtylady. 300 mıllııard teńgeniń ınvestısııalyq qarjysy quıylyp, 14 myń jańa jumys orny qurylady. Jumys tobynyń otyrysynda aımaq basshysy Qumar Aqsaqalov Elbasy tapsyrmasyn oryndaýdyń mańyzdylyǵyn, keshendi jumystar óńirdiń áleýmettik-ekonomıkalyq damýyna zor serpin beretinin, turǵyndardyń ómir súrý sapasyn nyǵaıtatynyn atap kórsetti. Tek bıyldyń ózinde ǵana jylý, jaryq, sý júıelerin qalpyna keltirýge respýblıkalyq qazynadan 5,1 mıllıard teńge baǵyttalyp otyr. «Bes áleýmettik bastama» jobasy boıynsha 2018-2019 jyldary oblys ortalyǵynda 1,5 myń páter turǵyzylady. Bir sózben aıtqanda, «Astana eldiń barlyq óńirine óń beretin jáne memleket júreginiń jumys qabyletine jańǵyryq bolyp jetetin barsha qoǵamdyq qatynastyń jıyntyǵy» ekenin soltústikqazaqstandyqtar da jaqsy sezinedi.
Mereıtoı qarsańynda «Astana – beıbitshilik pen kelisimniń bastaýy» atty sharany Qazaqstan halqy oblystyq assambleıasy uıymdastyryp, qazirgi zamanǵa laıyq astana salý ıdeıasy, búgingi kúni álemdik zor mártebege ıe elordanyń qalyptasý tóńireginde taǵylymdy áńgimeler qozǵaldy. «Qazaq tili» halyqaralyq qoǵamy jergilikti uıymynyń tóraǵasy Jankeldi Tájınniń aıtýynsha, Astana Qazaqstannyń, qazaq halqynyń brendine aınalyp, jer júzi Táýelsizdiktiń , halyqtar dostyǵynyń sımvoly retinde tanıdy. «Abylaıhan rezıdensııasy» mýzeı kesheninde «Kıeli Túrkistan» kórmesi ashylyp, jurtshylyq nazaryna nebir qundy jádigerler usynyldy. «Áziret Sultan» memlekettik tarıhı-mádenı qoryq murajaıy jylyna 60-tan astam is-shara ótkizip, astana ajaryn aıshyqtaýǵa da zor úles qosyp keledi.
«Asyl mıras «qaıyrymdylyq qorynyń qoldaýymen jaqynda balalar aýrýhanasyna 76,6 mıllıon teńgeniń stasıonarlyq sandyq rentgenografııalyq kesheni, ámbebap ýltradybystyq jáne eki dezınfeksııalyq kamera tartý etildi. Saltanatty rásimde sóılegen sózinde qordyń dırektory Marat Aıtmaǵambetov memleket-jekemenshik áriptestigi sheńberinde qolǵa alynǵan jobalar elorda mereıtoıyna arnalǵanyn, elimizde alty saýyqtyrý ortalyǵy ashylǵanyn, 366 bala emdeý kýrstarynan ótkenin, sońǵy bes jylda jarty mıllıard teńgeniń qaıyrymdylyq sharalary kórsetilgenin jetkizdi. О́ńirde medısınalyq klaster qurý, 700 oryndyq kópsalaly aýrýhana turǵyzý mindeti tur.
Osylaısha Astananyń 20 jyldyǵy Qyzyljar óńirinde de keń kólemde atap ótilip, turǵyndardyń erekshe qyzyǵýshylyǵyn týdyrdy.
О́mir ESQALI, «Egemen Qazaqstan»
Soltústik Qazaqstan oblysy