Búgin QR Ulttyq mýzeıi men Shensı Tarıh mýzeıi (QHR, Sıan q.) «Altyn adamnyń álem mýzeılerine sherýi» atty halyqaralyq kórme jobasyn júzege asyrý aıasynda «Uly Dala murasy: zergerlik óner jaýharlary» atty biregeı kórmeni ashty, dep habarlaıdy QR Ulttyq mýzeıiniń baspasóz qyzmeti.
Kórmeniń negizgi maqsaty – sheteldik aýdıtorııany Eýrazııa Uly dala beldeýiniń mádenı muralarymen tanystyrý.
«Altyn adam» túsinigi tarıh ǵylymynda ataqty arheolog ǵalym, qazaqstandyq arheologııanyń negizin qalaýshylardyń biri Kemal Aqyshevtiń arqasynda paıda boldy. Tolyqtaı altynan kıim kıgen saq jaýyngeri – birinshi «Altyn adam» tabylǵan Qazaqstannyń ońtústigindegi Esik qorǵanynda zertteý júrgizgen mine osy kisi bolatyn. Baǵa jetpes qazyna ǵasyr jańalyǵy retinde tanylyp, shartty túrde «Altyn adam» dep ataldy.
Sharanyń ashylý saltanatynda sóz alǵan Qazaqstannyń Qytaıdaǵy elshisi Shahrat Nuryshev: «Búgin Qazaqstan Respýblıkasy Ulttyq mýzeıi Qazaqstannyń eń baǵaly tarıhı eksponaty bolyp tabylatyn saq dáýirindegi Altyn adamdy ákelip otyr. Búgingi kúnde Qazaqstannyń jańa tarıhı kezeńge qadam basýyndaǵy baǵdar retinde qabyldanǵan Qazaqstan Prezıdenti Nursultan Nazarbaevtyń «Bolashaqqa baǵdar: rýhanı jańǵyrý» maqalasy sheńberindegi myń jyldyq tarıhymyzdaǵy tól mádenıetimiz álem qurlyqtaryna jol tartty. Búgingi Uly dala kórmesi Qazaqstannyń elordasy Astananyń 20 jyldyǵyna jáne «Bir beldeý, bir jol» bastamasynyń 5 jyldyǵyna oraı uıymdastyryldy. Qazaqstan men Qytaı tarıhı kórshiles elder bolyp Uly Jibek jolyn jańǵyrtýǵa birigip atsalysyp keledi. 2013 jyly Qytaı Tóraǵasy Sı Szınpın Astana qalasynda tuńǵysh ret Jibek jolynyń ekonomıkalyq beldeýin qurý týraly bastamany jarııa etýi eki memleket arasyndaǵy strategııalyq áriptestiktiń bıik deńgeıin dáleldeıdi. «Altyn adam» eksponaty qytaı jerine ekinshi márte kelip otyrǵanyn atap ótken jón. 2013 jyly Beıjiń qalasyndaǵy Qytaı Ulttyq mýzeıine qoıylyp, óte joǵary baǵaǵa ıe bolǵan. Osy úrdis jalǵasyn taýyp otyrǵany qýantady. Kórmege usynylǵan kóptegen tarıhı derekter arqyly Uly dalanyń erekshelikteri men onyń rýhyn sezinip, qundy dúnıelerimen tanysyp, qazaq eliniń tól tarıhynan tıisti aqparat alasyzdar dep oılaımyn», - dedi.
Ekspozısııalanatyn kolleksııa tiziminde XV ǵasyrdyń (Ońtústik Qazaqstannyń Saıram qalashyǵy) basyna tán dep belgilengen zergerlik ónerdiń biregeı týyndylary, sol sııaqty Ortalyq Qazaqstandaǵy Taldy–II qorǵanynan tabylǵan jádigerler de (j.s.d. VII ǵ. ortasy jáne 2-jartysy) bar.
QR Ulttyq mýzeıi dırektorynyń orynbasary Abaı Satýbaldın: «Kórmeniń basty eksponattary - «Altyn adam» men «Taqsaı altyn hanshaıymy». Birden atap ótý kerek, Qazaqstan men Qytaı ózara strategııalyq áriptes bolyp tabylady. Bizdiń memleketterimizdiń arasyndaǵy qarym-qatynas ózara birlestiktiń úlgisindeı tanylyp otyr. Bizdiń mádenı jobamyz halyqaralyq asa iri shara ekeni belgili. Bul kórme jobasy osy kúnge deıin Belorýssııa, Reseı jáne Ázerbaıjan mýzeılerinde bolyp keldi. Ári qaraı osy jyldyń aıaǵyna deıin Polsha jáne Ońtústik Koreıada ótkizý josparlanǵan. Halyqtardy jaqyndastyrýda, olardyń arasyndaǵy dostyq pen yntymaqtastyqty nyǵaıtýda mádenıet úlken ról atqarady», - dedi.
Qazaqstan Respýblıkasy Ulttyq mýzeıi qorlarynan usynylǵan altyn zattardyń az ǵana bóligi - Eýrazııa dala mádenıeti murasynyń ózindik ereksheligin kórsetetin sheberler týyndylary zergerlik óner dástúriniń úzdiksizdigin taǵy da bir ret dáleldeıdi.