Aqtaýda Chernobyl apaty men basqa da radıasııalyq apat qurbandaryn eske alýǵa arnalǵan stela ashyldy. Saltanatty jıynǵa Mańǵystaý oblysynyń ákimi Eraly Toǵjanov, QR Parlament Májilisiniń depýtaty Iýrıı Tımoshenko, Qazaqstandaǵy Ýkraına isterindegi ýaqytsha senimdi ókili Vladımır Djıdjora, Chernobyldikter respýblıkalyq jáne aımaqtyq qoǵamdyq birlestikteriniń tóraǵalary men tóraǵa orynbasarlary qatysty.
Elbasy Nursultan Nazarbaev «Chernobyl apaty búkil álemdi atomdy beıbit maqsatta paıdalanýdaǵy qaýipsizdik máselesimen shyndap aınalysýǵa májbúr etken árekettiń bastaýyna aınaldy jáne bul synaqtardyń saldarlary áli de uzaq ýaqyt seziledi» degen bolatyn. Adamzatqa qaýip tóndirgen apat myńdaǵan janyń júregin áli de syzdatyp keledi. Semeı ıadrolyq synaq polıgony álemdegi eń úlken polıgon. Jarty ǵasyrǵa jýyq ýaqyt boıy onda 456 ıadrolyq jarylys jasaldy, onyń áreket etý jıyntyǵy 116 Chernobylge teń sanalady.
Shara barysynda qasıetti Mańǵystaý jerinde boı kótergen estelik stelaǵa Chernobyl topyraǵy salyndy. Jınalǵandar radıasııalyq apat qurbandaryn 1 mınýt únsizdikpen eske alyp, eskertkishke gúl shoqtaryn qoıdy.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy