Astana qalasynyń 20 jyldyq merekesine oraı 2018 jyldyń 10-12 shildesinde elordada «Azııanyń medıa dıalogi» sharasy uıymdastyrylyp jatqany belgili. Atalǵan aýqymdy sharanyń aıasynda «Qazmedıa ortalyǵynda» «Medıa-2020» konferensııasy boldy. Oǵan Eýropa men Azııanyń medıa basshylary qatysyp, paıymdy pikirlerin ortaǵa saldy.
Jıyn barysynda taraptar salada engizilgen jańashyldyqtardy talqylap, tájirıbe almasý barysyn tilge tıek etti. Basqosý barysynda álemdik medıanyń damý barysy da sóz boldy. «Qazmedıa ortalyǵy» bas dırektorynyń strategııalyq damý jáne halyqaralyq yntymaqtastyq jónindegi orynbasary Erlik Qarajan júrgizgen jıynǵa «Habar» agenttigi» AQ basqarma tóraǵasy Alan Ájibaev, AIR India bas dırektory Faıaz Shehrıar, COPEAM bas hatshysy Klaýdıo Kappon qatysty.
Jıyn barysynda Rýmynııa radıosynyń sálemdesý sózi men Qazaqstan Respýblıkasy Aqparat jáne kommýnıkasııalar mınıstri Dáýren Abaevtyń quttyqtaý sózi oqyldy.
«Men eń aldymen osyndaı mańyzdy sharaǵa qatysýshy retinde kelgenime qýanyshtymyn. Bul konferensııa medıa salasynyń kóp máseleleri boıynsha Eýropa men Azııa arasynda dıalog ornatady. Mundaı jıyn halyqaralyq jáne ulttyq teleradıo habaryn taratýshylardy, qaýymdastyqtardy, jeke medıa kompanııalardy, sonymen qatar Eýropa men Azııanyń jetekshi medıa menedjerleriniń basyn qosyp, ózara tájirıbe almasýdyń taptyrmas alańy deýge bolady. Bizdiń uıym aqparat taratý salasynan bólek, jas jýrnalısterdi mamandyqqa baýlý, olarǵa trenıng túrinde tájirıbe berý jumystarymen de turaqty túrde aınalysyp keledi. Jumysymyzdy negizgi eki baǵytqa bólip qarastyrýǵa bolady. Olar, eń birinshi uıymnyń bilikti músheleriniń basyn qosyp, aqparat keńistigindegi jańashyldyqtardy jınaqtaý. Ekinshisi, ózimizdiń bilgenimizdi ártúrli joǵary oqý oryndarynan quralǵan stýdenttermen bólisý. Osy oraıda túrli sharalar men festıvaldar uıymdastyrdyq. Sonymen qatar radıo men telearnalardan bólek bizde 3 radıojýrnal jumys jasaıdy. Árqaısynyń alar orny aıryqsha», dedi COPEAM bas hatshysy Klaýdıo Kappon.
Bul jıyn «Medıa dıalog: Ortalyq Azııaǵa nazar aýdarý» taqyrybymen órbidi. Sondaı-aq bedeldi spıkerler bas qosqan aýqymdy sharada jalǵan aqparat taratýshylarmen kúres máselesi de keńinen talqylanyp, odan qorǵaný joldary da kóterildi. Resmı rastalmaǵan aqparat taratý zańmen qýdalanatyny belgili. Mundaı jalǵan jańalyqtar tek Qazaqstannyń ǵana emes, búgingi tańda álem elderiniń de basa nazar aýdaratyn máselesi bolyp otyr. Osy oraıda dástúrli emes BAQ ókilderine ılanatyn aýdıtorııanyń aýqymy keńeıip kele jatqanyn sharaǵa qatysýshylar tilge tıek etti.
«Shyǵys pen Batys elderi arasynda aqparat taratý kezinde bólinýshilik baıqalady. Iаǵnı Batystyń basty aqparat arnalary Shyǵysta bolyp jatqan oqıǵalardy halyqqa obektıvti túrde jetkizbeıdi. Sondyqtan qos qurlyq arasynda osyndaı dıalogtiń bolǵandyǵy durys», deıdi AIR India bas dırektory Faıaz Shehrıar.
Al «Frans Medıamýn» kompanııasynyń halyqaralyq qatynastary boıynsha dırektory Djon Makýaıer áriptesiniń pikirin quptap, bul problemanyń týyndaýyna medıa naryqtyń jekeshelendirilýi de áser etýi múmkin ekenin tilge tıek etip, osy rette birigip jumys istep, aqparat quraldarynyń mártebesin odan ári kóterý kerektigin jetkizdi. Shara barysynda sóz alǵan «Habar» aenttigi» AQ basqarma tóraǵasy Alan Ájibaev agenttik quramyndaǵy arnalardyń jumys júıesimen tanystyryp, atqarylyp jatqan sharýalardy tilge tıek etti. Budan bólek konferensııanyń basqa sessııalarynda ártúrli mańyzdy máseleler kóterildi.
Raýan QAIDAR,
«Egemen Qazaqstan»